०५ साउन २०८३, मंगलबार
काठमाडौं महानगरपालिकाका मेयर उम्मेदवार केशव स्थापितले आफूलाई धेरै विश्वास युवाहरूमाथि भएको बताएका छन् । नेकपा (एमाले)बाट उम्मेदवार बनेका उनले युवाहरूमा पनि महिलाहरूमा धेरै विश्वास भएको बताएका हुन् ।
‘किनभने उहाँहरूले मैले कहिल्यै पनि भ्रष्टाचार गरेको पाइनँ, त्यसैले मलाई महिलामाथि विश्वास छ,’ उनले भने, ‘उनीहरू आएर आफ्नो खुबी देखाउन् । बराबरीभन्दा धेरै महिलाको सहभागिता चाहेको छु । म कैयौँ कुरा सुधार गर्छु ।’
अहिलेका युवा पुस्तालाई लिएर उनीहरूको योजनाअन्तर्गत जाँदा शहरले विकासको नयाँ रुप पाउने उनको भनाइ छ ।
यस्तै उनले गठबन्धनका उम्मेदवार आफूभन्दा कमजोर प्रतिस्पर्धी भएको बताए । प्रतिस्पर्धीहरू विनाकुनै योजना बोकेर महानगरको दाबी गरेको उनको भनाइ छ । उनले आफूले मेयरमा जितेपछि अहिलेको भन्दा १० गुणा बढी राजश्व उठाएर काम गर्ने बताए ।
स्थापितले महानगरले उठाउन बाँकी ४८ अर्ब राजस्व रहेको आफ्नो विज्ञ टिमले पत्ता लगाएको पनि बताए । साथै सो रकम आफू मेयर बनेको ६ महिनाभित्र उठाएर महानगर विकासका लागि काम गर्ने प्रतिबद्धता जनाए ।
उनले आफू मेयर बनेपछि सबैभन्दा पहिला त्रिचन्द्र कलेजको पुनः निर्माण गर्ने पनि उल्लेख गरे ।
