०७ साउन २०८३, बिहीबार
बेल्जियम सरकारलाई धेरै कर भुक्तानी गरेको रेकर्डमा पर्न सफल एक नेपाली व्यवसायी लोक दाहाललाई सम्मान गरिएको छ ।
व्यवसायीहरू लोक दाहाल र काशी दनैको संयुक्त लगानीमा सञ्चालित कम्पनी 'सुशी किङ ग्रुप'लाई बेल्जियममा धेरै कामदारलाई रोजगारी दिने वातावरण सिर्जना गरेको भन्दै प्रशंसा पनि गरिएको छ ।
बेल्जियमको प्रसिद्ध बिजनेस म्यगाजिन ट्रेन्डले हरेक वर्ष बेल्जियममा रहेका व्यापारीहरूको सरकारी सूचकहरूको आधारमा
मूल्याकंन गर्ने गर्दछ । यही प्रकियाको आधारमा छनोट भई 'सुशी किङ ग्रुप' सम्मानित भएको हो ।
यो सम्मानलाई बेल्जियमको व्यापारिक सर्कलमा निकै महत्त्वका साथ हेर्ने गरिन्छ । उनीहरूको कम्पनीले बेल्जियममा छिटो, छरितो तथा पारदर्शी वृद्धिदर कायम गरेको ट्रेन्ड अवार्डले बताएको छ ।
सन् १९७५ मा स्थापना भएर विश्वसनीय व्यापारिक र आर्थिक समाचार पस्कँदै आएको ट्रेन्डलाई बेल्जियमको व्यावसायिक जमातले महत्त्वपूर्ण व्यावसायिक आधार मान्ने गर्दछ ।
आफ्नो कम्पनी सम्मानित भएपछि दाहालले आफूहरूको मेहनत खेर नगएको र नेपाली समुदायका लागि यो प्रेरणाको स्रोत बन्न सक्ने बताएका छन् ।
काम गर्दै जाँदा चुनौतीहरू थपिए पनि यस्ता सम्मानले व्यापारी र लगानीकर्ताको मनोबल बढ्ने उनको बुझाइ छ ।
१० वर्षदेखि सञ्चालित उनीहरूको यो 'सुशी किङ ग्रूप' कम्पनी बेल्जियमभरिका कम्पनीमा ४२ औँ स्थानमा परेको थियो ।
एनआएनएनको नेतृत्व तहमा सक्रिय लोक दाहालका दर्जनौँ होटल तथा रेष्टुरेन्टमा लगानी छन् । उनले बेल्जियममा मात्र होइन नेपालमा पनि हाइड्रोपावर, होटल, कृषिलगायतका क्षेत्रमा ठूलो लगानी गरेका छन् ।
