नेपाली कांग्रेसका महामन्त्री गगन थापाले मंसिर या फागुमा प्रतिनिधि सभाको चुनाव हुने भन्दै अहिलेदेखि नै तयारीमा जुट्न कार्यकर्तालाई निर्देशन दिएका छन् । स्थानीय तह निर्वाचनबाट कांग्रेसको लोकप्रियता बढेकाले जनतालाई आश्वस्त तुल्याउने एजेन्डा लिएर चुनावमा जानुपर्ने उनले बताएका हुन् । 

नेपाली कांग्रेस भक्तपुरले स्थानीय तहमा निर्वाचित पदाधिकारीलाई बधाई दिन बुधवार आयोजना गरेको कार्यक्रममा महामन्त्री थापाले सरकारले केही समयमा चुनावको मिति घोषणा गर्ने भन्दै तयारीमा जुट्न कार्यकर्तालाई निर्देशन दिएका हुन् । 

‘यो चुनावमा कांग्रेसलाई भोट दिने मतदाताको संख्या बढेको छ । सीट मात्र बढेको होइन मतदान गर्नेको संख्या बढेको छ । लोकप्रियता बढेको छ,’ थापाले भने, ‘अब मंसिर या फागुनमा निर्वाचनमा जान्छौं, सरकारले केही दिनमा निर्णय गर्ला । आम निर्वाचन लाग्यो तपाईंहरूले आजैबाट तयारी थाल्नुस् ।’ 

महामन्त्री थापाले अरूका गल्ती कमजोरी औंल्याउने भन्दा पनि जनतालाई आश्वस्त पार्नेगरी चुनावमा जानुपर्ने बताए । ‘हिजो कसले के गरेन भनेर होइन, पाँच वर्ष जिम्मा पाउँदा हामी के गर्छौं र हिजोको गल्ती कसरी दोहोर्‍याउन्नौं भनेर जानुपर्छ,’ थापाले भने । 

महामन्त्री थापाले मध्यपुर ठिमी र चाँगुनारायण नगरपालिकालाई भक्तपुर जस्तै नमूना बनाउने काममा लाग्न निर्वाचित पदाधिकारीहरूलाई निर्देशन दिएका छन् ।