इरानको रिभोल्युसनरी गार्ड्सका एक कर्नेलको हत्या गरिएकोमा आफू जिम्मेवार रहेको इजरायलले अमेरिकासमक्ष स्वीकार गरेको विभिन्न सञ्चारमाध्यमहरूले खबर दिएका छन् । 

आइतवार तेहरानमा कर्नेल सैयद खोदायारीलाई उनकै घरबाहिर कारभित्र गोली हानेर हत्या गरेका थिए । 

इरानका राष्ट्रपति इब्राहिम रईसीले यस हत्याको बदला लिने प्रतिज्ञा गरेका छन् । रिभोल्युसनरी गार्ड्सले यसका लागि विश्वव्यापी घमण्डी तत्त्वहरू जिम्मेवार रहेको बताएको छ । त्यो भनेको अमेरिका र इजरायल जस्ता उसका साझेदार हुन् । 

बुधवार द न्युयोर्क टाइम्सले दिएको खबरअनुसार, इजरायलले अमेरिकी अधिकारीहरूलाई उक्त हत्या आफूले नै गराएको जानकारी दिएको छ । त्यसबारेमा जानकारी राख्ने एक गुप्तचर अधिकारीलाई पत्रिकाले उद्धृत गरेको छ । 

नाम नखुलाउने शर्तमा ती अधिकारीले बताएअनुसार, कुद्स फोर्सभित्रको गोप्य समूहको कारवाही रोक्नका लागि इरानलाई चेतावनी दिन यो हत्या गरिएको इजरायलले अमेरिकालाई बतायो । कुद्स फोर्स रिभोल्युसनरी गार्ड्सको विदेशी कारवाही इकाइ हो ।