मुस्ताङमा भएको विमान दुर्घटनाप्रति प्रधानमन्त्री देउवाले गरे दुःख व्यक्त

प्रधानमन्त्री शेरबहादुर देउवाले मुस्ताङमा भएको विमान दुर्घटनाप्रति दुःख व्यक्त गरेका छन् । 

सोमवार सामाजिक सञ्जाल ट्वीटरमार्फत् उनले दुर्घटनामा ज्यान गुमाउनेहरूप्रति श्रद्धाञ्जली व्यक्त गरे । साथै शोक सन्तप्त परिवारजनमा उनले समवेदनासमेत प्रकट गरेका छन् । 

‘पोखराबाट जोमसोमको लागि उडेको तारा एयरको यात्रुवाहक जहाज दुर्घटनाग्रस्त हुँदा विमानमा सवार सबैको निधन भएको खबरले निकै दु:खी भएको छु,’ उनले लेखेका छन्, ‘यस अकल्पनीय दुर्घटनामा जीवन गुमाउनुहुने विमान चालक दलका सदस्य र यात्रुहरुप्रति हार्दिक श्रद्धाञ्जली र शोक सन्तप्त परिवारजनमा समवेदना व्यक्त गर्दछु ।’

आइतवार पोखराबाट जोमसोमका लागि उडेको तारा एयर ९ एन–एईटी कलसाइनको ट्वीनअटर जहाज मुस्ताङको थासाङ गाउँपालिका–२ को सानुसरे भन्ने ठाउँमा दुर्घटनाग्रस्त अवस्थामा फेला परेको थियो । 

जहाजमा १३ जना नेपाली यात्रु, ६ जना विदेशी र ३ जना चालक दलसहित २२ जना सवार थिए ।