दुई मन्त्रालय छाड्न प्रधानमन्त्री शेरबहादुर देउवाले गरेको प्रस्तावमा छलफल गर्न बालुवाटार गएका जसपा अध्यक्ष उपेन्द्र यादव त्यहाँबाट फर्किएका छन् । 

उनीहरूबीच देउवाको प्रस्तावमा छलफल भएको थियो । स्रोतका अनुसार उपेन्द्र यादवले सरकार छाड्ने मनस्थिति बनाएका छन् । 

देउवाले लोकतान्त्रिक समाजवादी पार्टी (लोसपा)लाई सरकारमा ल्याउन चाहेका छन् । सोहीअनुरुप देउवाले जसपालाई दुई वटा मन्त्रालय छाड्न भनेको स्रोतले जनाएको छ । 

स्रोतका अनुसार देउवाले लोसपा अध्यक्ष महन्थ ठाकुरलाई दुई वटा मन्त्रालय र उपसभामुख दिने बताएका छन् । 

यसैबीच लोसपाका चार शीर्ष नेताहरू देउवालाई भेट्न मंगलवार बालुवाटार जाने भएका छन् । अध्यक्ष महन्थ ठाकुर, नेताहरू राजेन्द्र महतो, शरद सिंह र अनिल झा सरकारमा सहभागी हुने विषयमा छलफल गर्न मंगलवार बालुवाटार जाने स्रोतले बताएको छ ।