नेकपा एमालेका अध्यक्ष केपी शर्मा ओलीले गठबन्धन नहुँदा धुलोपिठो हुने भएकाले अहिले नै गठबन्धन नटुट्ने देखिएको बताएका छन् । 

गठबन्धन टुटाउन बल गर्नुपर्‍यो भनेर हल्ला चलेपनि एक्लै चुनावमा जाँदा धुलोपिठो हुने डरले उनीहरू गठबन्धन टुटाउन नचाहने ओलीले बताए ।

नेकपा एमाले विराटनगरले गरेको कार्यकर्ता भेलालाई सम्बोधन गर्दै ओलीले  आफूलाई साँढे र अरूलाई बाख्रासँग तुलना गरेका छन् । 

‘साढेसँग लड्न सक्दिन भनेर उनीहरूले गठबन्धन गरेका हुन्,’ ओलीले भने,‘गठबन्धनमै रहेका केहि दलहरुको हैसियत बाख्रा सँग लड्न सक्ने खालको छ ।’ 

भर्खरै सकिएको स्थानीय तहको चुनावमा एमालेको सबैको भन्दा मत राम्रो आएको समेत उनले दावी गरे । 

‘कांग्रेसको भन्दा एमालेको बढी छ,’ उनले भने,‘अरुको त हिसाब गर्नैपर्दैन । कांग्रेसको पनि गाँसगाँस जोडेर मात्रै त्यति भोट आएको हो । 

ओलीले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रति लक्षित गर्दै आफ्नो हैसियत हेरेर मात्रै अरुको हैसियत नाप्न सुझाव दिए ।

‘कांग्रेसले घमन्ड नगरोस् नत्र एमालेकै हालत बनाइदिउँला भनेर एक जना नेताले भाषण गरेछन्,’उनले भने,‘ती नेताको हाइट कतिको छ भनेर हेरेको त घुँडा घुँडा मात्रै रहेछ ।’

एमाले अध्यक्ष ओली अर्थमन्त्री जनार्दन शर्मा माथि पनि खनिएका छन् । 

‘आर्थिक वृद्धिदर ८ प्रतिशत पुर्‍याउँछु भनेर अर्थमन्त्रीले बजेट भाषणमा भन्नुभयो । यो हावादारी गफ हो,’ ओलीले भने,‘देशको मात्रै होइन जहाँसुकैको अर्थशास्त्रीलाई सोधेपनि यो लक्ष्य पुग्न सक्दैन । अर्थमन्त्री भएका व्यक्तिलाई यो विषयमा कसैले जानकारी गराएको हुनुपर्ने हो ।’