एमाले उपाध्यक्ष तथा पूर्व अर्थमन्त्री विष्णु पौडेलले लुम्बिनी आउने धार्मिक पर्यटकहरूको लागि निःशुल्क सेवा दिँदै आएको बुटवलस्थित पद्य चैत्य विहारको उद्घाटन गरेका छन् । 

पर्यटकहरूलाई पूजाआजा र गाँसबासको व्यवस्था गर्दै आएको पद्य चैत्य तुलसी–युक्त धम्म भवनको स्तरोन्नति गरिएको थियो । 

सो अवसरमा बोल्दै उपाध्यक्ष पौडेलले गौतम बुद्धसँग सम्बन्धित क्षेत्रहरूको विकास गरी पर्यटनसँग जोड्नुपर्ने बताए । 

उनले देशको आर्थिक समृद्धि पर्यटन र कृषिको आधुनिकीकरणबाट सम्भव रहेको बताए । पौडेलले बुटवललाई ऐतिहासिक शहरको रुपमा विकास गरी पर्यटकीय गन्तव्य बनाउन सकिनेमा जोड दिए । त्यसको लागि आफू सधँै लागिरहेको उनको भनाइ छ । 

विहारलाई विधिपूर्वक निर्माण र ढलोटको बुद्घमूर्ति स्थापना गराएका विहारका संरक्षक बिमलबहादुर शाक्यले बताए । २०५४ सालमा स्थानीय निर्वाचनपछि विहारलाई थप सौन्दर्यीकरण गरिएको थियो । 

कार्यक्रममा अध्यक्ष सुरेशरत्न बज्राचार्यले बौद्ध तीर्थयात्रीहरूलाई सेवा दिने गरी विहारको स्थापना भएको बताए ।