नेकपा एमालेका सांसद एवं पूर्व रक्षामन्त्री भीम रावलले परराष्ट्रमन्त्री नारायण खड्काको भूमिकालाई लिएर आपत्ति जनाएका छन् । 

प्रतिनिधि सभाको अन्तर्राष्ट्रिय सम्बन्ध समितिको शुक्रवार बसेको बैठकमा मन्त्री खड्काले अमेरिकी राज्य साझेदारी परियोजना (एसपीपी)बारे नकोट्याउन आग्रह गरेपछि रावलले आपत्ति जनाएका हुन् । 

‘परराष्ट्रमन्त्रीले एसपीपीको च्याप्टर क्लोज भयो । नकोट्याउँ भन्न पाइन्छ ? यो तपाईंको व्यक्तिगत मामिला हो ? सबै जनतालाई जानकारी गराउनु तपाईंको पदीय दायित्व हो,’ रावलले भने । 

एमाले सांसद रावलले एसपीपीबारे प्रतिनिधि सभामा पराष्ट्रमन्त्रीले भ्रमपूर्ण जवाफ दिएको बताए । ‘अमेरिकी उपविदेशमन्त्री उज्रा जियाले नेपाल भ्रमण गर्दा तिब्बती शरणार्थीको क्याम्प भ्रमण गर्नु देशको हितमा रहेको भनेर भन्नुभयो,’ रावलले यसो भन्दै गर्दा खड्काले आफूले नबोलेको दाबी गरे ।

रावलले प्रमाण दिन सक्ने बताएपछि मन्त्री खड्का चुप लागे । ‘तपाईंले कुरा काटेबाट तपाईंले बोलेको कुरा प्रमाणित हुन्छ,’ रावलले भने । 

एसपीपीको बारेमा मन्त्री खड्काले झुटो दाबी गरिरहेको उनले आरोप लगाए । ‘एसपीपी इण्डो प्यासिफिकको एउटा अंग हो भनेपछि अमेरिकाको रक्षा मन्त्रालयभन्दा बढी प्रवक्ता कोही छैन होला नि ? कि यो विषय यस्तै हो कोट्याउन हुँदैन ?,’ रावलले प्रश्न गरे ।

त्यसअघि संसदीय समितिको बैठकमा मन्त्री खड्काले एसपीपीको ‘च्याप्टर क्लोज’ भएको भन्दै नकोट्याउन आग्रह गरेका थिए ।