२३ जेठ २०८३, शनिबार
भारत सरकारले सैनिक भर्तीका लागि ल्याएको अग्निपथ योजनाको विरोध भएको छ ।
सेनामा नयाँ भर्ती भएका युवाले ४ वर्षमा अनिवार्य अवकाश पाउने गरी सरकारले ल्याएको योजनाको विरोध भएको छ ।
पूर्व तयारी र मेहनत गरेर सेनामा भर्ती भएपछि पनि ४ वर्ष मात्रै जागिर पाइने भएकाले युवाहरू विरोधमा उत्रिएका छन् । युवाको विरोधले उत्तर प्रदेश, बिहार, हरियाणा, हिमाञ्चल, उत्तराखण्ड, राजस्थान लगायत राज्यमा प्रदर्शनले हिंसाको रूप लिएको छ ।
प्रदर्शन उग्र भएपछि बिहारका १२ जिल्लामा ४८ घण्टासम्म मोबाइल र इन्टरनेट सेवा बन्द गरिएको भारतीय सञ्चारमाध्यमले जनाएका छन् । हरियाणाको १ जिल्लामा एसएमएस सेवा समेत बन्द गरिएको छ ।
सरकारले वार्षिक ४०/५० हजार युवालाई सेनामा भर्ती गर्न अग्निपथ योजना ल्याएको छ । योजनाअनुसार १७–२१ वर्षका युवा सेनामा भर्ती हुन पाउने र ४ वर्षपछि अनिवार्य अवकाश हुने प्रावधान छ ।
सेनामा भर्ती भइसक्दा समेत ४ वर्षपछि फेरि अन्यत्र जागिर खोज्नुपर्ने अवस्था आएकाले युवाले अग्निपथ योजनाको विरोध परेका छन् । अग्निपथ योजनामा भर्ती भएका सेनाले सरकारबाट पेन्सन समेत पाउने छैनन् ।
विरोध चर्किएपछि रक्षामन्त्री राजनाथ सिंहले छलफल शुरू गरेका छन् ।
