०४ असार २०८३, बिहीबार
मधेशी आयोगका अध्यक्ष डा.विजयकुमार दत्तले वैदेशिक रोजगारीका लागि विभिन्न देश लगेर अलपत्र पारिएकाहरूको तत्काल उद्धार गर्न माग गरेका छन् ।
वैदेशिक रोजगारीका नाममा धेरैलाई विदेशी भूमीमा पुर्याई अलपत्र पारिएको भन्दै उनले तत्काल उद्धार गर्न परराष्ट्रमन्त्री डा. नारायण खड्कासँग माग गरेका हुन् । मन्त्री खड्कासँग बिहीवार भएको भेटमा उनले वैदेशिक रोजगारीका नाममा ठगिनेमा धेरै मधेशी समुदायका युवा–युवती रहेको दाबी गरे । अलपत्र परेका युवायुवतीको उद्धार गरेर उनीहरूलाई न्याय दिलाउनुपर्ने अध्यक्ष डा. दत्तको आग्रह छ ।
डा.दत्तले आयोगमा वैदेशिक रोजगारसम्बन्धी विभिन्न किसिमको उजुरी आउने गरेको मन्त्री खड्कालाई जानकारी गराएका थिए । उनले त्यस्ता समस्या समाधानका लागि परराष्ट्र मन्त्रालयले सम्बन्धित निकायलाई निर्देशन गर्नुपर्ने आग्रह गरेका थिए ।
मन्त्री खड्काले आफू उक्त समस्याका बारेमा सचेत रहेको भन्दै पीडितलाई न्याय दिलाउन कुनै कमी कमजोरी हुन नदिने प्रतिबद्धता जनाएका थिए । उनले मन्त्रालय र आयोगबीच समस्या समाधानका लागि समन्वय हुनुपर्ने धारणा राखे ।
