प्रमुख प्रतिपक्ष नेकपा (एमाले)ले सरकारले चरम अनियमितता र सत्ताको दुरुपयोग गरिरहेको आरोप लगाएको छ । 

एमालेको स्वास्थ्य तथा जनसंख्या विभागले शुक्रवार गरेको पत्रकार सम्मेलनमा सरकारले ठूलो मात्रामा बजेटको रकमान्तर गरेर दुरुपयोग गरेको आरोप लगाएको हो । आर्थिक वर्ष सकिन दुुई दिनमात्र बाँकी रहँदा स्वास्थ्य तथा जनसंख्या मन्त्रालयले बजेट रकमान्तर गरेर आर्थिक अपचलन र पदीय जिम्मेवारीको दुरुपयोग गरेको एमालेको आरोप छ । 

उक्त विभागका प्रमुख योगेशकुमार भट्टराईले सरकारको एक वर्षे कार्यकाल पूर्णतः असफल भएको पनि दाबी गरेका छन् । चालू आर्थिक वर्षमा स्वास्थ्य मन्त्रालयमा मात्रै १ अर्ब २२ करोड बेरुजु आएको उल्लेख गर्दै उनले सरकार आर्थिक अनुशासनमा पनि असफल भएको आरोप लगाए । 

एमालेले संसदीय समितिहरूमा छलफल नगराई स्वास्थ्य तथा जनसंख्यासम्बन्धी विधेयक धमाधम पारित गरिरहेको भन्दै आक्रोश व्यक्त गरेको छ । स्वास्थ्य क्षेत्रको अनुसन्धान कमजोर हुने गरी सरकारले स्वास्थ्य संस्था र स्वास्थ्यकर्मीहरुको सुरक्षासम्बन्धी ऐन २०६६ को संशोधन र औषधि ऐन २०३५ को संशोधन गरेको आरोप लगाएको छ ।

‘सरकारले स्वास्थ्यसम्बन्धी  विधेयकहरु संसदीय समितिमा छलफल नगरी धमाधम पारित गरिरहेको छ,’ भट्टराईले भने, ‘औषधि ऐन, २०३५ को संशोधनले खोप, औषधि र औषधिजन्य पदार्थको अनुसन्धानका लागि ऐनद्वारा स्थापित नेपाल स्वास्थ्य अनुसन्धान परिषदको भूमिकालाई न्यून बनाएर नेपालमा स्वास्थ्य अनुसन्धानलाई हतोत्साही गरेको छ । केही व्यक्ति वा गलत संस्थाको नियमलाई बल पुग्ने गरी ऐन संशोधन भएको देखिन्छ ।’

सरकारले कोभिड महामारीमा खटिएका स्वास्थ्यकर्मीहरुलाई अझै जोखिम भत्ता उपलब्ध नगराएको पनि एमालेले असन्तुष्टि जनाएको छ ।