इन्डियन प्रिमियर लीग (आईपीएल) का पूर्व अध्यक्ष ललित मोदीले यतिबेला चर्चामा छन् । उनी जीवनको दोस्रो पारी शुरू गर्न खोज्दैछन् । 

मोदीले बलिउड अभिनेत्री सुष्मिता सेनसँग विवाह गर्ने तयारी गरेका छन् । उनले सामाजिक सञ्जाल इन्स्टाग्राममा फोटो शेयर गर्दै सम्बन्धबारे जानकारी दिएका छन् ।

मोदीले सुष्मितासँग विवाह गरेमा यो दोस्रो विवाह हुनेछ । यसअघि मोदीले आफूभन्दा १० वर्ष जेठी आमाकी साथी मीनलसँग पहिलो विवाह गरेका थिए ।

मोदीले सन् १९९१ मा पहिलो विवाह गरेका थिए । दुवैको सम्बन्ध ठीकठाक चलिरहेको बेला सन् २०१८ मा क्यान्सरका कारण मीनलको निधन भएपछि उनी एक्लै थिए । त्यतिबेला मीनलको उमेर ६३ वर्ष थियो ।

मीनलले पहिलो विवाह साउदी अरबका व्यापारी जेक सगरानीसँग गरेकी थिइन् । तर उनी मुद्दा लागेर जेल परेपछि सम्बन्धविच्छेद भएको थियो ।

ललितकी आमा र मीनल मिल्ने साथी थिए । मीनल ललितको घरमा आउजाउ गर्थिन्, त्यसकै क्रममा दुवैको ‘लभ’ पर्‍यो । ललित र मीनलले विवाह गर्ने कुरा गर्दा शुरूमा घरपरिवारले मानेका थिएनन् तर अन्तिममा विवाहका लागि राजी हुनुपरेको थियो । ललित र मीनलका २ बच्चा छन् ।