सरकारी अस्पतालमा सेवा लिने बिरामीका लागि अब रगत सम्बन्धी सबै सेवा निःशुल्क हुने भएको छ ।

२०७९ साउन १ गतेदेखि लागू हुने गरी प्रदेश सरकारले बिरामीका लागि आवश्यक पर्ने रगतमा लाग्ने सबै सेवा शुल्क निःशुल्क गरेको हो ।

बुटवलमा रहेको लुम्बिनी प्रादेशिक अस्पताल र रक्तसञ्चार केन्द्रबीच रगतका लागि लाग्ने सबै सेवा निःशुल्क गर्ने सहमति भएको हो ।

अस्पतालका तर्फबाट मेडिकल सुपेरिन्टेन्डेन्ट डा. ईन्द्र ढकाल र रक्तसञ्चार केन्द्रका तर्फबाट संयोजक कृष्ण पंगेनीले सम्झौता पत्रमा हस्ताक्षर गरेका थिए । साउन १ गतेदेखि अस्पतालको सिफारिसमा रक्तसञ्चार केन्द्रले कुनै पनि सेवा शुल्क नलिई रगत उपलब्ध गराउने भएको छ ।

लुम्बिनी प्रदेश सरकारले विनियोजन गरेको बजेटबाट रगतमा लाग्ने सेवा शुल्क सरकारले दिने रक्तसञ्चार केन्द्र बुटवलका संयोजक तथा नेपाल रेडक्रस सोसाइटी लुम्बिनी प्रदेशका महामन्त्री कृष्ण पंगेनीले बताए । 

प्रदेशभर ६० लाख प्वाइन्ट रगत संकलन र व्यवस्थापन रेडक्रसमार्फत भइरहेको भन्दै अब सरकारी अस्पतालमा रगतका लागि लाग्ने सेवा शुल्क पनि सरकारले दिने भएपछि लुम्बिनीमा रगत पूर्णरूपमा निःशुल्क भएको उनले बताए ।

अस्पतालमा आएका बिरामीलाई रगत आवश्यक पर्ने भए चिकित्सकको सिफारिसमा रक्तसञ्चार केन्द्रले पूर्णरूपमा निःशुल्क रगत उपलब्ध गराउने अस्पतालका मेडिकल सुपेरिन्टेन्डेन्ट डा. ईन्द्र ढकालले बताए । यसअघि रगतका लागि आवश्यक पर्ने कभर, ग्रुपिङ, स्टोर म्यापिङ लगायतका काम गर्न ८०० रुपैयाँसम्म शुल्क लाग्ने गर्दथ्यो ।