भूमि व्यवस्था, सहकारी तथा गरिबी निवारणमन्त्री शशी श्रेष्ठले आगामी दुई वर्षभित्र भूमिसँग सम्बन्धि सम्पूर्ण समस्या समाधान हुने दाबी गरेकी छन् । 

सोमवार प्रधानमन्त्री निवास बालुवाटारमा आयोजित एक कार्यक्रममा उनले दुई वर्षभित्रमा भूमिसँग सम्बन्धित सबै समस्या समाधान हुने दाबी गरेकी हुन् । कमैया मुक्त घोषणा गरिएको २२ वर्ष पुगेको उपलक्ष्यमा आयोजित कार्यक्रममा उनले भनिन्,‘सरकार मुक्त कमैया, हरुवाचरुवा लगायत जग्गाहीनलाई जमिनको मालिक बनाउने कार्यमा दत्तचित्त भएर लागेको छ ।’ 

भूमिहीनलाई उच्च प्राथमिकताका साथ अभियानको रूपमा कार्यक्रम सञ्चालन गरी ८ महिनाको समयावधिमा करिव ४९ हजार घरपरिवारलाई जग्गाधनी प्रमाणपत्र वितरण गरिसकेको उनले जानकारी दिइन् । मन्त्री श्रेष्ठले वर्तमान सरकार उपलब्ध साधन श्रोत, तथा आर्थिक विकासको प्रतिफलको न्यायोचित वितरण गर्ने, भूमिमा रहेको दोहोरो स्वामित्वको अन्त्य गर्ने काममा लाaगिपरेको बताइन् । 

उनले सरकार सीमान्तकृत तथा पिछडिएको वर्गको हितलाई ध्यानमा राखेर वैज्ञानिक भूमि सुधारको पहलमा लागेको बताइन् । ‘सरकार विकासका दृष्टिले पछि परेका क्षेत्रलाई प्राथमिकता दिँदै सन्तुलित, समावेशी, गुणस्तरीय र दिगो विकास हासिल गर्न नीतिअनुरुप अघि बढिरहेको छ’  मन्त्री श्रेष्ठले भनिन्, ‘भूमिमा रहेको दोहोरो स्वामित्वको अन्त्य गर्ने गरी सरकारले नीति बनाउँदैछ ।’ 

मन्त्री श्रेष्ठले सरकार लोक-कल्याण्कारी राज्य स्थापना गर्न लागिपरेको बताइन् ।