रुसका राष्ट्रपति भ्लादिमिर पुटिन पश्चिमविरोधी खेमा निर्माणका लागि मंगलवार इरान पुगेका छन् । 

त्यहाँ उनले राष्ट्रपति इब्राहिम रईसी र सर्वोच्च नेताआयातोल्लाह खमेनीसँग वार्ता गर्नेछन् । दुई देशबीचको सम्बन्ध बलियो बनाउने उद्देश्यका साथ वार्ता गरिन लागेको हो । 

युक्रेनविरुद्ध पाँच महिनाअघि युद्ध शुरू गरेयता पुटिन दोस्रोपटक मात्र विदेश भ्रमणमा गएका हुन् । 

इरानले रुसलाई युक्रेन युद्धमा प्रयोग गर्नका लागि ड्रोन दिन लागेको भनी अमेरिकाले गत साता चेतावनी दिएको थियो । 

इरानलाई रुसले ड्रोनको पुरस्कारका रूपमा नखुलाइएको सैन्य सहायता उपलब्ध गराउने संकेत छ । 

रुसी पत्रकार येभ्गेनी पोपोभले रुस र इरान मिलेर असलको धुरी बनाउने बताएका छन् । अमेरिकाका पूर्व राष्ट्रपति जर्ज डब्ल्यू बुशले इरान, इराक र उत्तर कोरियालाई खराबको धुरी भनी चित्रित गरेकोमा त्यसलाई व्यंग्य गर्न पोपोभले असलको धुरी भनेका हुन् । 

इरानले आफ्नो आणविक कार्यक्रमलाई तीव्रता दिएर आणविक हतियार बनाउन सक्षमता हासिल गरिसकेको बताएको छ । अमेरिकाका पूर्व राष्ट्रपति डोनल्ड ट्रम्पले आणविक सम्झौता त्यागेर इरानमाथि कठोर प्रतिबन्ध लगाएपछि इरानले आणविक हतियार निर्माणमा अग्रता हासिल गरेको हो । रुसले पनि पश्चिमलाई तर्साउनका लागि आणविक हतियारको प्रदर्शन गर्ने गरेको छ । 

पश्चिम र क्षेत्रीय प्रतिद्वन्द्वीहरूका कारण चेपुवामा परेको इरानले युरेनियम संवर्धनलाई बढाएको छ । 

इरानमाथि पश्चिमले लगाएको प्रतिबन्ध हट्ने कुनै लक्षण नदेखिएपछि इरानले रुससँग घनीभूत सम्बन्ध बनाइरहेको छ ।