०२ साउन २०८३, शनिबार
जनता प्रगतिशिल पार्टीका सांसद हृदेयश त्रिपाठीले निजी बैंकहरू मिटरव्याजी साहुजस्ता भएको आरोप लगाएका छन् । नियामक निकाय राष्ट्र बैंक लाचार बन्दा निजी बैंक छाडा भएको उनले आरोप लगाए ।
आइतवार बसेको प्रतिनिधि सभा बैठकको विशेष समयमा पूर्वमन्त्री त्रिपाठीले निजी बैंकले देशको अर्थतन्त्रलाई भार बोकाउने काम गरिरहेको आरोप लगाएका हुन् ।
‘बैकहरू नाफामुखी टाइसुट धारी मिटरव्याजी साहु जस्ता भए । नियमन र नियन्त्रण छैन, उद्योगमा लगानी गर्न चाहँदैनन्, अनुत्पादक देशको अर्थतन्त्रलाइ भार बोकाउने कार्यमा लिप्त छन् । कुनैपनि बैंकले १० प्रतिशत कृषिमा गरेका छैनन् र राष्ट्र बैंक लाचार भएर बसिरहेको छ’ त्रिपाठीले भने ।
बैंक नाफामा जाने र ऋण लगानीकर्ताहरू घाटामा जाने कुरा अर्थतन्त्र बर्बादीको संकेत भएको उनले दाबी गरे । त्रिपाठीले बैंकहरूले लिइरहेको अकुत नाफाबारे मौद्रिक नीतिले कुनै सम्बोधन गर्न नसकेको आरोप लगाए ।
