०२ साउन २०८३, शनिबार
अमेरिकी सेनाको सदर्न कमान्डकी कमान्डर जनरल लाउरा रिचार्डसनले दक्षिण अमेरिकामा चीनको प्रभाव बढेकोमा चिन्ता व्यक्त गरेकी छन् ।
गत साता एस्पन सिक्योरिटी फोरममा आफ्नो कुरा राख्दै रिचार्डसनले बताइन्, ‘पनामा कनालमाथि उड्दा अनि कनालका दुवैतर्फ चीनका सरकारी कम्पनीहरूको बोर्ड देख्दा मलाई पीर लाग्छ । ती नागरिक कम्पनी वा सरकारी स्वामित्वका संस्था जस्ता देखिन्छन् र दोहोरो काममा उपयोग गरिन सक्छन् ।’
‘तिनलाई आवश्यक परेमा तत्कालै सैन्य क्षमतायुक्त संरचना बनाउन सकिन्छ,’ उनले थपिन्, ‘उनीहरूले गरेको लगानी हेर्दा हामीले चिन्ता गर्नुपर्ने स्थिति छ ।’
सदर्न कमान्डले दक्षिण अमेरिकालाई कभर गर्ने गर्छ ।
त्यसकी कमान्डर रिचार्डसनले विश्वको ६० प्रतिशत लिथियम भण्डार दक्षिण अमेरिकामा रहेको स्मरण गराइन् । लिथियम विद्युतीय उपकरणहरूमा उपयोग गरिने पदार्थ हो । त्यस्तै हलुका कच्चा तेल, दुर्लभ पदार्थ र संसारको ३१ प्रतिशत पिउनयोग्य पानी पनि दक्षिण अमेरिकामा छ ।
‘हाम्रा शत्रुहरूले यस क्षेत्रबाट दिनदिनै फाइदा उठाइरहेका छन्,’ रिचार्डसनले बताइन् ।
चीनले उक्त क्षेत्रमा आफ्नो चासो र लगानी दुवै बढाएको छ । आफूले नभई चीनले दक्षिण अमेरिकाको प्राकृतिक स्रोत दोहन गर्ने भयो भनी अमेरिकाले चिन्ता मानेको रिचार्डसनको बयानले देखाउँछ ।
