रूपन्देहीको गैडहवा गाउँपालिकामा नेपाली कांग्रेसबाट निर्वाचित प्रतिनिधिहरूले गरेको तालाबन्दीका कारण सेवाग्राही मारमा परेका छन् । उनीहरूले केही समय अगाडि मात्र आएका प्रमुख प्रशासकीय अधिकृत विपिन क्षेत्रीलाई काम गर्न नदिने भन्दै एकसाता अघि गाउँपालिकाको कार्यालयमा ताला लगाएका थिए । 

उनीहरूले प्रमुख प्रशासकीय अधिकृत क्षेत्री आर्थिक अनियमिततामा मुछिएको आरोप लगाएका छन् । त्यस्तै, गाउँपालिकामा कार्यरत करारका कर्मचारी हटाउन नहुने उनीहरूको माग छ । 

वडा नम्बर २ का अध्यक्ष सरोजउद्धिन धुनिया,  ३ का अध्यक्ष राम अजोर धुनिया, ४ का सुरेन्द्र सिंह कुर्मीलगायतले साउन २ गते गाउँपालिकामा तालाबन्दी गरी गरेका थिए । 

वडा नम्बर ४ का वडा अध्यक्ष सुरेन्द्र कुर्मी आफूहरुले ११ बुँदे माग राखेर तालाबन्दी गरेको बताए । उनले दुरुपयोग भएको राजस्व दाखिला र विवादमा परेका कर्मचारीलाई एक पटक सुध्रिने मौका दिए समस्या समाधान हुने बताए ।

गाउँपालिकाका अध्यक्ष सरेन्द्र पौडेलले अर्थहीन माग राखेर पालिकामा तालाबन्दी गरिँदा जनता सेवाबाट बञ्चित हुन पुगेको बताए । उनले प्रमुख प्रशासकीय अधिकृत क्षेत्रीको कार्यकक्ष र लेखा र प्रशासन शाखामा तालबन्दी गरिएपछि कार्यालयको सम्पूर्ण कामकाज ठप्प भएको जानकारी दिएका छन् । 

रोजगार संयोजक पदमा कार्यरत मनिषा कार्कीलाई गाउँपालिकाले हटाएपछि विवाद शुरू भएको बताइएको छ । पालिका अध्यक्ष पौडेलले उनको कामकारबाही सन्तोषजनक नभएकाले हटाइएको जानकारी दिए । उनलाई स्पष्टीकरण सोधिएको र स्पष्टीकरण चित्त बुझ्दो नभएकाले उनको करार अवधि थप नगरिएको पौडेलको भनाइ छ । 

प्रमुख प्रशासकीय अधिकृतले राजस्व हिनामिना गरेको आरोपमा पनि सत्यता नभएको पालिका अध्यक्ष पौडेलको दाबी छ । ‘उहाँहरूले बाढी पीडित किसानहरूलाई राहत रकम दिनुभएन भन्नु भएको छ, त्यो पालिकाले दिने होइन,’ उनले भने, ‘जिल्ला प्रशासन कार्यालयाबाट आएपछि मात्र हामीले वितरण गर्ने हो । आएकै छैन अनि हामीले कसरी वितरण गर्ने ?’ 

गाउँपालिकाको प्रमुख उपप्रमुखमा एमालेको नेतृत्व छ ।