०२ साउन २०८३, शनिबार
जनता समाजवादी पार्टीकी सांसद रेनुका गुरुङले सोमवार राति आफ्नो घरमा बम पड्काइएको दाबी गरेकी छन् । मंगलवार बसेको प्रतिनिधि सभा बैठकको शून्य समयमा सांसद गुरुङले देशद्रोहीले आफ्नो घरमा बम पड्काएको बताएकी हुन् ।
‘हिजो राति ८ः२५ बजे देशद्रोहीले मेरो घरमा बम पड्कायो, झ्यालबाट हेर्दा मोटरसाइकलमा दुईजना भागे, अध्यारो भएकोले मैले चिन्न सकिन’ गुरुङले भनिन्, ‘महाराजगञ्ज थानामा फोन गरे । गृहमन्त्रीलाई फोन गरेको उठेन । प्रहरी आएपछि कम्पाउण्डमा ओर्ले । प्रहरीले कम्पाउण्डभित्र रकेट बमको खोल लिएर गएको छ ।’
सांसद गुरुङले आफू संघीय सांसद र राज्यमन्त्री भइसकेकोले पूर्व राज्यमन्त्रीले पाउनुपर्ने सुविधा पाउनु पर्ने दाबी गरिन् । प्रतिनिधि सभा विघटनको बेला गुरुङ केपी ओली सरकारमा राज्यमन्त्री बनेकी थिइन् । संसद विघटनको बेला मन्त्रिपरिषद् विस्तार गर्न नमिल्ने भन्दै १३ दिनमै उनको पद सर्वोच्चले खाइदिएको थियो ।
यसअघि सुरक्षाकर्मीले सलाम नगरेको भन्दै संसद्मा गुनासो गरेकी थिइन् ।
