काठमाडौं, १३ साउन — भारतको गुडगाँवमा एउटा ब्युटी पार्लरमा काम गर्ने युवकलाई आफ्नो ग्राहकमाथि दुर्व्यवहार गरको आरोपमा पाँच वर्ष कैद सजाय र ५० हजार भारु जरिवानाको सजाय सुनाइएको छ ।

यी आरोपितको नाम रवि हो र उनले आफ्नो ब्युटी पार्लरमा पेडिक्योर गर्न आएकी एक १७ वर्षीया बालिकालाई दुर्व्यवहार गरेको पाइयो ।

रविको उमेर २० वर्ष बताइएको छ । उनलाई प्रोटेक्सन अफ चाइल्ड फ्रम सेक्सुअल अफेन्सेस अन्तर्गत दोषी पाइएको थियो ।

सेसन कोर्टकी न्यायाधीश रजनी यादवले भनिन्, ‘यस्ता किसिमका फैसलाहरूबाट समाजमा एउटा कडा सन्देश जान्छ र पीडितहरू पनि अपराधको सूचना दिन उत्प्रेरित हुन्छन् । कडा सजायको डरले मानिसहरू महिला तथा बालिकाको गरिमामा चोट पु–याउन डराउँछन् ।’

पार्लरमा भएको अप्रिय अनुभवका बारेमा बच्चीले आफ्नी आमालाई बताइन् । त्यसपछि रविलाई मे २०१६ मा पक्राउ गरियो ।

घर गएर बच्चीले आफ्नी आमालाई बताएअनुसार रविले पेडिक्योर गर्दा उनको गोडाभन्दा निकै माथिसम्म हात दौडाइरहेको थियो । त्यति मात्र नभएर उसले पेडिक्योर गर्न धेरै बेर पनि लगायो ।

अदालतमा बयान दिँदै आमाले भनिन्, ‘पेडिक्योर घुँडासम्म गरिन्छ तर रविले मेरी छोरीको तिघ्रासम्म हात पु–यायो र यो अनुचित व्यवहार हो । मेरी छोरी यो कुरा बताउँदाखेरी रोइन् ।’

प्रहरीका अनुसार पेडिक्योर गराउँदा बालिकाले शर्ट्स लगाएकी थिइन् र रविले उनको शर्ट्स पनि माथि सारिदियो । उसको हर्कत देखेर बालिकालाई असहज लाग्यो र उनले छिट्टो पेडिक्योर सक्न भनिन् ।

घटनाक्रम थाहा भएपछि बालिकाकी आमाले पार्लर मालिकसँग कुरा गरिन् र रविविरुद्ध मुद्दा चलाउने निर्णय भयो ।

एजेन्सी