जनता प्रगतिशील पार्टीका अध्यक्ष हृदयेश त्रिपाठीले आगामी चुनावमा सहकार्यका लागि नेकपा एमालेका अध्यक्ष केपी शर्मा ओलीसँग प्रस्ताव गरेका छन् । 

सोमवार एमाले अध्यक्ष ओलीलाई भेटेर उनले चुनावी सहकार्यको प्रस्ताव गरेका हुन् ।

२०७४ सालको चुनावमा त्रिपाठी एमालेको चुनाव चिह्न लिएर निर्वाचनमा सहभागी भएका थिए ।

त्यसबेला चुनाव जितेका त्रिपाठीले फेरि चुनाव जिते भने ६ पटक सांसद बन्छन् । उनी ४ पटक त मन्त्री नै भइसकेका छन् । 

‘एमाले अध्यक्ष केपी ओलीसँग समसामयिक राजनीतिका बारेका कुराकानी गर्न गएको हुँ । त्यस अवसरमा चुनावी सहकार्यका बारेमा सामान्य चर्चा भयो,’ त्रिपाठीले लोकान्तरसँग भने । 

उनले एमाले अध्यक्ष ओलीलाई फेरि पनि सूर्य चिह्नमा चुनाव लड्न आफू तयार रहेको जानकारी गराएको बुझिएको छ । 

तर एमालेले भने आफ्नो पार्टी भित्रको सिट बाँडफाँटको अवस्था र जीतहारको मत विश्लेषणपछि मात्रै त्रिपाठीलाई एमालेको चुनाव चिह्न दिने वा नदिने भन्नेबारे निर्णय गर्ने एमाले नेताहरूले बताएका छन् । 

गत निर्वाचनमा सूर्य चिह्नबाट त्रिपाठीले चुनाव जितेपछि उनलाई एमालेमा प्रवेश गराउन एमाले नेताहरूले सक्दो प्रयास गरेका थिए तर त्रिपाठीले भने आफ्नै नेतृत्वमा दल खोलेका थिए ।

त्यसबाहेक ओलीसँग नागरिकता विधेयक, सत्ता गठबन्धनले गरिरहेको काम आदिबारे पनि छलफल भएको त्रिपाठीले बताए ।