अभिनेत्री आँचल शर्माको मुख्य भूमिका रहेको चलचित्र ‘वर एण्ड वधु’को प्रदर्शन मिति तय गरिएको छ ।

निर्देशक मिलन चाम्सका अनुसार चलचित्रले फागुन १९ गतेलाई आफ्नो प्रदर्शन मिति तय गरेको हो ।

रोमानियामा चलचित्रको छायांकन सकेर नेपाल फर्किएलगत्तै यसको निर्माण टीमले चलचित्रको प्रदर्शन मिति तय गरेको हो । वितरकसँग सल्लाह गरेर फागुनलाई प्रदर्शन मिति तय गरिएको निर्देशक चाम्सले बताए ।

लभ स्टोरी र कमेडी जनरामा तयार भइरहेको ‘वर एण्ड बधु’मा अभिनेत्री आँचलसँगै नव–अभिनेता विवेक कर्माचार्यको मुख्य भूमिका छ । रोमानियामा छायांकनका केही तस्वीर समेत निर्माण पक्षले सार्वजनिक गरेको थियो, जसमा आँचल र विवेक रोमान्टिक देखिएका छन् ।

एलआरके इन्टरटेन्मेन्टको ब्यानरमा चलचित्र तयार भएको हो । चलचित्रका कार्यकारी निर्माता डा. अमित रिजाल हुन् । चलचित्रमा जानुका थापाको लगानी छ ।

भदौ र असोजपछि नेपाली चलचित्रका निर्माताको आँखा फागुन महिनामा बढी देखिएको छ । मंसिरको निर्वाचन र त्यसलगत्तै आउने विश्वकप फूटबलका कारण पनि धेरै निर्माता फागुन र चैतलाई टार्गेट गरिरहेका छन् ।