नेकपा माओवादी केन्द्रका सांसद गजेन्द्र महतले राष्ट्रपति कार्यालयबाट महत्वपूर्ण निर्णयहरू रातिको समयमा हुने गरेको भन्दै नागरिकता विधेयक राति पठाउन सरकारलाई सुझाव दिएका छन् । नागरिकता विधेयक फिर्ता गरेकोमा उनले आपत्ति जनाए । 

बिहीवार बसेको प्रतिनिधि सभा बैठकको शून्य समयमा सांसद महतले राष्ट्रपति कार्यालयबाट अप्ठ्यारो काम राति हुने भन्दै ठट्टा गरेका हन् । ‘सभामुख महोदय हाम्रो सरकारलाई के सल्लाह छ भने नागरिकता विधेयक पुनः राष्टपतिज्यू कहाँ पठाउनु पर्ने होला । उक्त विधेयक राष्ट्रपति कार्यालयमा दिउँसो पठाउनु भएन । किनभने अप्ठ्यारा काम राति नै फत्ते हुन्छन् । प्रमाणीकरण गर्नुपर्ने होला । दिउँसो नपठाउनु होला मन्त्रीज्यूलाई सुझाव । राष्टपति कार्यालयलाई रातिमा काम गर्ने बानी परेको छ, दिउँसो पठाउँदा हुँदैन । राति १२ बजेपछि पठाउने बानी परेको छ’ महतले भने ।

प्रतिनिधि सभा विघटन राति भएको भन्दै उनले व्यंग्य गरेका हुन् । राष्ट्रपतिले फिर्ता पठाएको नागरिकता विधेयकमाथि बिहीवार प्रतिनिधि सभामा छलफल भइरहेको छ ।