नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले धरानपुगेर श्रमदान गरेका छन् । धरानका मेयर हर्क साम्पाङले श्रममा सहभागी हुन आह्वान गरेपछि प्रचण्डले शुक्रवार पूर्व गएको मौकामा धरान पुगेर वृक्षरोपन गरेका हुन् । 

प्रचण्डले सर्दु खोलाको मुहान क्षेत्र जाने ओसो पार्कमा वृक्षरोपन गरेका हुन् । वृक्षरोपनमा सहभागी भएपछि उनले धरान र त्याहाँको नेतृत्वको कामलाई सिंगै देशले गम्भीरतापूर्वक हेरिरहेको बताए । 

‘म के भन्न चाहन्छु भने हामी कम्युनिस्टहरूले अझ खासगरी माओवादीले गर्नुपर्ने काम उहाँले गरिराख्नुभा छ । म पार्टीका साथी र जनतालाई हर्कको व्यवहार आचरणबाट प्रेरणा लिन आग्रह गर्छु’, उनले भने, ‘यसमा डटिराख्नुस्, जनतासँग जोडिइराख्नुस्, मेरो र हाम्रो साथ रहिरहनेछ ।’ 

प्रचण्डले धरानका मेयर र उपमेयरको जोडी मिलेको प्रतिक्रिया दिएका छन् । ‘उपमेयर हाम्रो पार्टीबाट हुनुहुन्छ । उहाँहरूको जोडी असाध्यै मिलेको देखिएको छ । अनुहार पनि मिलेको छ । काम पनि मिलेको छ’, उनले भने ।

धरानका उपमेयर आइन्द्रविक्रम बेघा माओवादी केन्द्रका तर्फबाट निर्वाचित भएका थिए । 

यसअघि काठमाडौं भ्रमणका क्रममा मेयर हर्क साम्पाङले प्रचण्डलाई खुमलटारमै भेटी धरान आएर श्रममा सहभागी हुन निम्तो गरेका थिए । प्रचण्ड र साम्पाङको भेटको चाँजोपाँजो उपमेयर बेघाले नै मिलाएका थिए ।