बुबाको मुख हेर्ने दिनको अवसर पारेर शनिवार चलचित्र ‘महापुरुष’को ‘बा’ शीर्षकको गीत सार्वजनिक गरिएको छ । सार्वजनिक गीतमा कवि नवराज पराजुलीको शब्द र ऋदम कँडेलको संगीत, संगीत संयोजन एवं स्वर छ । 

चलचित्रको चल÷अचल दृश्यहरू गीतमा समावेश गरिएको छ । बुबा र सन्तानबीचको सम्बन्धलाई देखाइएको गीत मर्मस्पर्शी छ । चलचित्रका मुख्य कलाकारहरू अभिनेता हरिवंश आचार्य, नव–अभिनेता अरुण क्षेत्रीलगायतलाई गीतमा देखाइएको छ । 

प्रदीप भट्टराई लिखित एवं निर्देशित चलचित्र ‘महापुरुष’ कात्तिक ११ गते (भाइटीकाको भोलिपल्ट)बाट देशव्यापी प्रदर्शनमा आउँदैछ । 

सामाजिक विषयवस्तुमा निर्माण गरिएको चलचित्रमा हरिवंश र अरुणका अलावा मदनकृष्ण श्रेष्ठ, गौरी मल्ल, अन्जना बराइली, रविन्द्र सिंह बानियाँ, राजाराम पौडेललगायतको शीर्ष भूमिका छ । 

षट्कोण आर्ट्सको प्रस्तुति रहेको चलचित्रका कार्यकारी निर्माता रविन्द्र सिंह बानियाँ हुन् भने निर्माताको रूपमा म्याक्स दिपेश खत्री छन् । दीपक बज्राचार्यको छायांकन रहेको चलचित्रलाई मित्र डि. गुरुङले सम्पादन गर्नेछन् ।