१३ असार २०८३, शनिबार
भारतको उत्तर प्रदेशस्थित नोयडामा अवैध रूपमा बनेको सुपरटेक ट्विन टावर भत्काउने तयारी अन्तिम चरणमा पुगेको छ ।
सर्वाेच्च अदालतको आदेशपछि भारतमा ट्विन टावर भत्काउने तयारी अन्तिम चरणमा पुगेको हो ।
आइतवार दिउँसो २ः३० बजे टावर भत्काउने तयारी छ । यसका लागि आसपासका घर र भवनहरू खाली गराइएको छ भने ती घरहरूको बीमा गरिएको छ ।
स्थानीय क्षेत्रमा खाना पकाउने ग्यास र बिजुलीको आपूर्ति बन्द गरिएको भारतीय सञ्चारमाध्यमले जनाएका छन् । स्थानीय सडकमा आवतजावत समेत बन्द गरिएको छ । विस्फोट गराएर टावर भत्काइने भएको छ । उत्तर प्रदेश प्रहरीले आसपासको क्षेत्र खाली गराउन आइतवार बिहान ७ बजेसम्मको समय दिएको थियो ।
सरकारी प्राधिकरण र घरजग्गा व्यापारीको मिलेमतोमा पटक–पटक नक्सा संशोधन गर्दै तला थप्दै गएपछि अदालतमा मुद्दा पुगेको थियो । व्यापारीले सरकारी संयन्त्रलाई भ्रष्टाचारमा लोभ्याउन सके पनि अदालतले स्थानीयलाई न्याय दिएको छ । यतिबेला टावर भत्किने घटना भारतको सर्वाधिक चासोको घटना बनेको छ ।
