नेपाली युवा उद्यमी मञ्च नेपालको काठमाडौं च्याप्टरले ‘नेपाली युवा उद्यमी मञ्च काठमाडौं स्टाटअप अवार्ड’ आयोजना गर्ने भएको छ । अध्यक्ष चिराग गोयलद्वारा जारी विज्ञप्तिमा अवार्डबारे जानकारी दिइएको हो । मञ्चले युवाहरूलाई व्यवसायिक क्षेत्रमा लाग्न प्रेरित गर्ने उद्धेश्यले उत्कृष्ट स्टार्टअफ आइडियालाई पुरस्कृत गर्ने तयारी गरेको हो । संस्थाले यो कार्यक्रममार्फत नयाँ उद्यमीहरूलाई आवश्यक पर्ने एक्पोजर, मेन्टोरसिप र लगानीको अवसर प्रदान पनि गर्ने जानकारी दिएको छ । 

यस अवार्ड कार्यक्रममा सहभागी हुन चाहने उद्यमीको लागि निश्चित मापदण्ड तोकिएको छ । सहभागी हुन चाहने स्टार्टअप कम्पनीहरू नेपाल सरकारले तोकेको कार्यालयमा दर्ता भएको हुनुपर्नेछ । त्यस्तै, स्टार्टअप स्थापना भएर ५ वर्ष नकटेको हुनु पर्ने अध्यक्ष गोयलले बताए । 

अवार्डमा भाग लिन चाहने स्टार्टअपले प्रदान गरिएको अथवा गर्न चाहेको वस्तु उत्पादन वा सेवा तयारी अवस्थामा हुनुपर्ने छ । स्टार्टअपले आफ्नो सबैभन्दा नजिकको समयमा गरिएको अडिटेड वित्तिय विवरण (अडिट रिपोर्ट) बुझाउनु पर्नेछ । अडिटेड वित्तीय विवरण नभएको खण्डमा प्रोभिजनल वित्तीय विवरण बुझाउनु पर्ने विज्ञप्तिमा उल्लेख गरिएको छ । 

आयोजकले तोकेको सबै आवश्यक कागजपत्र पेश गरेपछि निर्धारित समयमा उपस्थित हुने कम्पनीहरूमात्र अवार्डको लागि योग्य हुनेछन् । नेपाली युवा उद्यमी मञ्चको सदस्यता लिएको उद्यमीले सञ्चालन गरेको कम्पनी भने सहभागी हुन नपाउने अध्यक्ष गोयलले बताए । 

यस प्रतिस्पर्धामा पहिलो र दोस्रो तथा पिपुल्स च्वाइस अवार्ड प्रदान गरिनेछ । उक्त स्टार्टअप अवार्डमा उत्कृष्टले पहिलोले ४ लाख, दोस्रोले २ लाख तथा पिपुल्स च्वाइस अवार्ड जित्नेले १ लाख रुपैयाँ नगद पुरस्कार प्राप्त गर्ने आयोजकले जनाएको छ । दर्ता फारम भदौ १० गतेदेखि खुला रहेको छ । दर्ता फारम मञ्चको बेवसाइटबाट प्राप्त गर्न सकिने बताइएको छ । 

यस कार्यक्रमको मुख्य प्रायोजक सगरमाथा इन्स्सोरेन्स र सह प्रायोजक सिद्धार्थ बैंक लिमिटेड रहेका छन् । 

मञ्च युवा उद्यमीहरूको मुख्य संस्था हो । नेपाली युवाबीच आइडिया एक्सचेन्ज, फेलोसिफ शिक्षा, प्रशिक्षण र एडभोकेसी गर्ने उद्धेश्यले स्थापना भएको मञ्चलाई नेपाल उद्योग वाणिज्य महासंघले सन २००३ सालमा आधिकारिक मान्यता प्रदान गरेको थियो । त्योसँगै मञ्चले नेपाली युवाहरूमा उद्यमशीललाई विकास गर्ने, संस्थालाई विस्तार गर्ने कार्यहरू गर्दै आइरहेको थियो ।

मञ्चको काठमाडौं च्याप्टर सन् २०१६ मा स्थापना भएको थियो । उद्यमीको विकास गर्ने लक्ष्य लिएको यस संस्थाले विभिन्न टकशो, मेन्टोरसिप विक, मास्टरक्लास र अरु विभिन्न सामाजिक कार्यहरू पनि गर्दै आएको छ । 

सरकारले नेपालमा स्टार्टअप उद्यमी विकासको लागि १ अर्ब रुपैया विनियोजन गरेको छ । जसमा नयाँ स्टार्टअपहरूले परियोजनाको आधारमा २५ लाख बिना धितो पाउन सक्ने प्रावधान राखिएको छ । यस घोषणाले नेपाली उद्यमीहरू पूर्ण रूपमा लाभान्भित हुने र उद्यमी परिदृश्य विकासमा टेवा पुग्ने मञ्चले विश्वास व्यक्त गरेको छ ।