काठमाडौं, १६ साउन– त्रिभुवन अन्तर्राष्ट्रिय विमानस्थलबाट सुन तस्करी गर्नेहरु फेरि सक्रिय भएका छन् ।

सोमबार मध्याह्न दुई किलो सुनसहित एक विदेशी नागरिक पक्राउ परेपछि विमानस्थलमा सुन तस्कर पुनः सक्रिय भएको तथ्य बाहिर आएको हो ।

सोमबार मध्याह्न सवा १२ बजे थाई एयरलाइन्सको विमानबाट नेपाल आएका विदेशी नागरिक दुई किलो सुनसहित पक्राउ परेका हुन् । विशेष सूचनाको आधारमो अध्यागमन नआइपुग्दै सुनसहित विदेशी नागरिकलाई पक्राउ गरेको विमानस्थल प्रहरीले जानकारी दिएको छ ।

पक्राउ पर्ने व्यक्ति विदेश नागरिक भएको बताइए पनि कुन देशका नागरिक हुन भन्नेबारे केही खुलाइएको छैन ।

सुनसहित पक्राउ परेका व्यक्तिमाथि थप अनुसन्धान भइरहेको प्रहरीले जनाएको छ ।