बेलायतमा लिज ट्रस कन्सर्भेटिभ पार्टीकी नेता तथा प्रधानमन्त्री बनेपछि सामाजिक सञ्जालमा धमाधम बधाई आइरहेका छन् । 

प्रधानमन्त्री शेरबहादुर देउवाले समेत ट्रसलाई बधाई दिएका छन् । 

तर कतिपयले झुक्किएर गलत महिलाको ट्विटर ह्यान्डलमा गएर पनि बधाई दिएका छन् । 

स्विडनकी प्रधानमन्त्री माग्दालेना एन्डरसनले लिज ट्रसलाई बधाई त दिइन् तर अर्कै महिला लिज ट्रसलको ह्यान्डललाई मेन्सन गरिन् । 

त्यो ह्यान्डल सन् २००९ देखि लिज ट्रसल नामक महिलाले चलाइरहेकी छन् । याट द रेट लिजट्रस नभई नवनिर्वाचित बेलायती प्रधानमन्त्रीले याट द रेट ट्रसलिज ह्यान्डल चलाउँछिन् । 

ट्रसलले बधाई खाएपछि रिप्लाई गर्दै ‘ल, छिट्टै भेटौं’ लेखिन् । अनि एन्डरसनलाई ‘मासुका डल्ला पनि तयार पार्न’ सुझाव दिइन् । 

त्यसपछि स्विडनकी प्रधानमन्त्रीले आफ्नो ट्वीट डिलिट गरिन् । 

त्यस्तै किसिमले ब्राइटनकी सांसद क्यारोलाइन लुकास पनि झुक्किइन् । उनले याट द रेट लिजट्रसलाई मेन्सन गर्दै प्रधानमन्त्रीलाई व्यंग्य गरिन् । तर गलत ह्यान्डल मेन्सन भएको थाहा पाएपछि उनले माफी मागिन् ।