झापाको एक परिवारका सबै सदस्य लागुऔषध तस्करीमा संलग्न भएको खुलेको छ । लागुऔषध नियन्त्रण ब्यूरोले आज (मंगलवार) गरेको पत्रकार सम्मेलनमा ब्यूरो प्रमुख एसएसपी विकास खनालले परिवार नै लागुऔषधको तस्करीमा लागेको पाइएको जानकारी दिए । 

प्रहरीले लागुऔषध खैरो हेरोइन, गाँजा, बुर्फिनोफिन, हाइजेपामलगायत लागुऔषधसहित १५ जना काराेबारीलाई सार्वजनिक गरेको छ । उनीहरूको साथबाट प्रहरीले १० लाख ४० हजार रुपैयाँ नगद पनि बरामद गरेको छ ।  सार्वजनिक गरिएकामध्ये खैरो हेरोइनको तस्करीमा परिवार नै संलग्न देखिएको एसएसपी खनालले बताए ।

‘हामीले झापाबाट पक्राउ गरेका नौसाद आलम र अप्सरा राजवंशी सहोदर दाजुबहिनी हुन् उनीहरूको परिवार नै लागुऔषध तस्करीमा लागेको देखिएको छ’, एसएसपी खनालले पत्रकार सम्मेलनमा भने ।

प्रहरीले ललितपुर महानरपालिका–९ भालाखेका ३२ वर्षीय सञ्जय कपाली, रामेछाप मन्थली नगरपालिका–१३ फुलासीका २७ वर्षीय कुमार तामाङ, ललितपुर महानरपालिका–१७ दुपाटका २९ वर्षीय अनिस महर्जनलाई २२ हजार नगद, १७ वटा मोबाइल, ७ वटा घडी र ४ वटा गितारसहित पक्राउ गरेको छ ।

एसएसपी खनालका अनुसार अनिस महर्जनले लागुऔषध प्रयोगकर्तालाई मोबाइल, घडी, गितारलगायतका सामानहरू धितो राखेर लागुऔषधको सुई लगाइदिने गरेको अनुसन्धानमा देखिएको छ । प्रहरीले अनिसलाई नियमितरूपमा लागुऔषध ल्याइदिने सप्तरी डाक्नेश्वरी नगरपालिका–७ का २७ वर्षीय धरमदेव रामलाई पनि पक्राउ गरेर सार्वजनिक गरेको छ । उनले भारतबाट लागुऔषध ल्याएर अनिसलाई दिने गरेको अनुसन्धानबाट देखिएको ब्यूरोले जनाएको छ । 

यस्तै प्रहरीले साढे ४० ग्राम खैरो हेरोइनसहित ललितपुरबाट भैसेपाटीका २२ वर्षीय प्रताप कार्की, पाँचथर फिदिम नगरपालिका–१ का २४ वर्षीय भुवन विक र २५ वर्षीय देङ्ग हाङ्ग नेम्वाङलाई पक्राउ गरेको छ । 

२४७ ग्राम खैरोहोइनसहित गोकर्णेश्वर ९ माकलबारीका २५ वर्षीय उत्सव घिमिरे, भोजपुर ट्याम्केमैयुङ गाउँपालिका–९ का ४१ वर्षीय दोर्ची शेर्पा र भोजपुर पौवाढुङ्मा गाउँपालिका–१ की ३२ वर्षीया फुर्लामी शेर्पालाई प्रहरीले पक्राउ गरेको छ । प्रहरीले सोही घटनामा झापा मेचीनगर नगरपालिका–१५ की ३० वर्षीया अप्सरा खातुन भन्ने अप्सरा राजवंशी र उनका दाजु ४४ वर्षीय नौसाद आलमलाई प्रहरीले झापाको काँकडभित्ताबाट पक्राउ गरेको जनाएको छ । 

प्रहरीको अनुसन्धानमा उनीहरूले भारतबाट नेपालमा लागुऔषध ल्याएर विभिन्न ठाउँमा सप्लाई गर्ने गरेको प्रहरी अनुसन्धानमा देखिएको एसएसपी खनालले बताए ।

अमेरिकाको क्यालिफोर्नियाबाट २ केजी गाँजा पार्सल

लागुऔषध नियन्त्रण ब्यूरोले अमेरिकाको क्यालिर्फोनियाबाट २ केजी गाँजासहित ३ जनालाई पक्राउ गरेको छ । अमेरिकाबाट गोश्वरा हुलाक मार्फत आएको २ केजी गाँजा लिन आउने काभ्रेपलाञ्चोक मन्डनदेपुर नगरपालिका–७ का २८ वर्षीय मनोज राई, काठमाडौं नक्सालका ३० वर्षीय अंकितकुमार श्रेष्ठ र काठमाडौं खुसिबुका ३० वर्षीय राहुल क्षेत्रीलाई पक्राउ गरेर सार्वजनिक गरेको छ । 

प्रहरीले उनीहरूलाई लागुऔषध रिसिभ गर्न गएको अवस्थामा पक्राउ गरेको हो । कसले किन पठाएको हो भन्ने विषयमा अनुसन्धान भइरहेको प्रहरीले जनाएको छ ।

ब्यूरोका अनुसार अहिले बजारमा १ ग्राम लागूऔषधको १० हजार, एम्पुलको २ सय, गाँजाको प्रतिकिलो ३७ हजारका दरले बिक्री हुने गरेको जनाएको छ । प्रहरीले २९ लाख ९९ हजार ४ सय रुपैयाँ बरारबरको लागुऔषध नियन्त्रणमा लिएको जनाएको छ ।