०९ साउन २०८३, शनिबार
नेकपा एमालेका वरिष्ठ उपाध्यक्ष ईश्वर पोखरेलले आगामी निर्वाचनमा सत्ता गठबन्धनका कुनै पनि दलहरूसँग एमालेले तालमेल नगर्ने बताएका छन् । मंगलवार नयाँ बानेश्वरस्थित संसद् भवन बाहिर सञ्चारकर्मीहरूसँग कुरा गर्दै वरिष्ठ उपाध्यक्ष पोखरेलले यस्तो बताएका हुन् ।
पोखरेलले एमालेले स्थानीय आवश्यकताको आधारमा तालमेल गरे पनि अहिलेको गठबन्धनको जस्तो केन्द्रीय तहको गठबन्धन नगर्ने स्पष्ट पारे । उनले एमालेले प्रगतिशील र राष्ट्रवादी विचार मिल्ने पार्टीहरूसँग राजनीतिक सहकार्य गर्नसक्ने बताए । उनले स्थानीय आवश्यकताको आधारमा एमालेले २०४८ सालदेखि तालमेल गर्दै आएको बताउँदै २०४८ सालमा कांग्रेससँग समेत तालमेल गर्न खुला गरेको बताए ।
‘नेकपा एमालेले कुनै पनि केन्द्रीय तहको गठबन्धन गर्दैनौँ । अहिले जसरी सत्तागठबन्धन भएको छ । यो निर्वाचनमा वर्तमान गठबन्धन रहेसम्म गठबन्धनका पुजारीहरूसँग एमालेको कुनै तालमेल हुँदैन’, उनले भने, ‘तर तालमेलको कुरामा स्थानीय आवश्यकता अनुसार विभिन्न ठाउँहरूमा हुनसक्छ । जहाँ पोलटिकल पोलोराइजेसन हुनसक्छ । प्रगतिशील विचारधारा बोक्ने, राष्ट्रियताको पक्षघरहरूसँग तालमेलको नयाँ सम्भावना छ ।’
