काठमाडौं, १७ साउन— मंगलवार विहान राजधानी काठमाडौंको लाजिम्पाटमा करेन्ट लागेर ढलेका रामेछापका राजु लामाको अहिले वीर अस्पतालको ट्रमा सेन्टरमा उपचार भइरहेको छ । उनलाई लाजिम्पाटको तीनदोबाटो स्थित टंगाल जाने चोकमा करेन्ट लागेको थियो ।
विहान साढे ४ बजे ठमेलबाट चक्रपथ कामका लागि जान लागेका उनलाई लैनचौरकमा करेन्ट लागेको हो । ‘पोलबाट आएको तीनवटा तार सडकमा भएको पानीमै लत्रिएको रहेछ,’ उनले अस्पतालको शैयाबाट लोकान्तरसंग भने, ‘पानीमा टेक्ने वित्तिकै मलाई करेन्ट लाग्यो ।’
करेन्ट लाग्ने वित्तिकै आफू त्यहाँ ढलेको उनले बताए । ‘मेरो होस पनि यहीँ आएपछि खुलेको हो,’ उनले भने । उनलाई प्रहरीले घटनास्थलबाट अस्पताल पुर्याएको थियो । डाक्टरहरुका अनुसार उनको मुटुमा समेत समस्या देखिएको छ । खुट्टामा गहिरो चोट लागेको छ ।
‘अहिले सम्म १० हजार रुपैयाँ खर्च भयो, अब खर्च गर्ने पैसा पनि छैन,’ अस्पतालमा भेटिएका उनका आफन्तले भने, ‘प्लाष्टिक सर्जरी समेत गर्न भनेको छ । तर कसरी गर्ने पैसा नै छैन ।’
लामाकी श्रीमती रामेछापमै खेती किसानी गर्छिन् । उनको पनि काठमाडौं आउने अवस्था नरहेको आफन्तहरुले बताए । डाक्टरहरुका अनुसार घाइते लामालाई अझै एक हप्ता अस्पतालमै रहनुपर्छ ।
काठमाडौंमा यत्रतत्र छरिएका तारका कारण पैदल हिडने बटुवालाई जोखिम बढेको छ । जसको सिकार रामेछापका राजु लामा भए ।
सरकारी निकायको लापरवाहीका कारण घाइते भएका लामाको उपचारमा भने कसैले चासो देखाएका छैनन् ।
