युक्रेनी सेनाले खार्कोभमा पाइरहेको सफलतामा उत्साहित भए पनि एक अमेरिकी अधिकारीले रुसी सेनाको क्षमतालाई कम आँक्न नमिल्ने बताएका छन् । 

ह्वाइट हाउसको राष्ट्रिय सुरक्षा प्रवक्ता जोन कर्बीले पत्रकारहरूसँग मंगलवार कुरा गरेका हुन् । उनले भने, ‘युक्रेनमा समस्या बेहोरिरहेको भए पनि रुसी सेना अहिले पनि विशाल र शक्तिशाली छ । राष्ट्रपति भ्लादिमिर पुटिनसँग विशाल सैन्य क्षमता बाँकी नै छ । त्यसको उपयोग उनले युक्रेनमा मात्र नभई अन्त पनि गर्न सक्छन् ।’

युक्रेनी सैनिकहरू गत सातादेखिको कारवाहीमा खार्कोभ क्षेत्रको उत्तरी र पूर्वी भागमा अघि बढ्न सफल भएका छन् । युक्रेनका राष्ट्रपति भोलोदीमीर जेलेन्स्कीले २ हजार वर्गकिलोमिटर क्षेत्र रुसबाट खोसिसकेको बताएका छन् । मस्कोले रणनीतिक रूपमा महत्त्वपूर्ण इज्युम शहरबाट आफ्ना सेनालाई डोनबासमा सारेको जानकारी दिएको छ । 

यसअघि एबीसी टीभीको गूड मर्निङ अमेरिका कार्यक्रममा कर्बीले अहिलेकै गतिमा युक्रेनले कारवाही अघि बढाउने विषयमा आत्मविश्वास व्यक्त गरे । उनीहरूले प्रत्याक्रमण कारवाहीका लागि निकै ध्यानपूर्वक योजना बनाएको कर्बीको भनाइ छ । 

द न्युयोर्क टाइम्स पत्रिकाका अनुसार, बेलायती र अमेरिकी सैन्य अधिकारीहरूले युक्रेनी सेनासँग मिलेर प्रत्याक्रमणको योजना बनाएका हुन् । किएभमा रहेका अमेरिकाका नयाँ डिफेन्स अट्याशे ब्रिगेडियर जनरल ग्यारिक हार्मोनले प्रत्याक्रमणअघि युक्रेनका शीर्ष अधिकारीहरूसँग दैनिक छलफल गरेको बताए ।