०८ असार २०८३, सोमबार
फिल्म प्रदर्शनका लागि मिति पाउन यतिबेला निर्मातालाई हम्मेहम्मे छ ।
फागुनसम्मकै लागि फिल्महरु पाइपलाइनमा छन् ।
कतिपय मितिमा दुई/तीनवटा फिल्मले प्रदर्शन मिति तोकेका छन् ।
सिंगल प्रदर्शनको अवसर बिरलै फिल्मलाई मात्र मिल्ने देखिएको छ ।
यसैबीच, घनश्याम लामिछाने निर्देशित फिल्म ‘लण्डन टु पेरिस’ले प्रदर्शन मिति घोषणा गरेको छ ।
यो फिल्मले फागुन ५ गतेका लागि प्रदर्शन मिति घोषणा गरेको हो ।
उक्त मितिका लागि यसअघि नारायण रायमाझी निर्देशित फिल्म ‘परदेशी २’ले प्रदर्शन मिति घोषणा गरेको थियो ।
अब भने, ‘परदेशी २’ र ‘लण्डन टु पेरिस’ एकैदिन प्रदर्शनमा आउने भएका हुन् ।
एबी इन्टरनेसनलले निर्माण गरेको फिल्म ‘लन्डन टु पेरिस’ बेलायत र फ्रान्समा छायांकन गरिएको हो ।
फिल्ममा साम्राज्ञी राज्यलक्ष्मी शाह, गरिमा शर्मा, कबिर खड्का, निश्चल खड्का, मनिष श्रेष्ठलगायत कलाकारको अभिनय छ ।
फिल्मको कथा, पटकथा तथा संवाद प्रदीप भारद्वाजले लेखेका हुन् ।
‘परदेशी २’मा भने प्रकाश सपूत, केकी अधिकारी, प्रशान्त तामाङ, दिलिप रायमाझी, वर्षा शिवाकोटी लगायतको अभिनय छ ।
