२५ जेठ २०८३, सोमबार
सरकारले एक पालिका एक सडक पुर्याउने अभियानअन्तर्गत अघि बढाएको लमजुङको दोर्दी गाउँपालिकाको केन्द्रसम्म जोड्ने सडक निर्माण अवधि सकिए पनि काम अधुरै छ ।
गण्डकी प्रदेश सरकारको लगानीमा जिल्लाको दोर्दी गाउँपालिकाको केन्द्र जोड्न उदीपुर–रिठ्ठेबगर–नौथर सेरा सडक कालोपत्रे गर्न तोकिएको अवधि सकिए पनि काम सम्पन्न हुन नसकेको हो । २ वर्ष (गत असार २ गते) सम्ममा निर्माण सम्पन्न गर्ने भनी सम्झौता भएको थियो ।
काठमाडौंस्थित कन्ट्रयाक निर्माण प्राइभेट लिमिटेडले निर्माण गर्दै आएको सडक विक्रम संवत् २०७७ असार ३ गते सम्झौता भएर २०७९ असार २ गते कालोपत्रे गरिसक्नुपर्ने सम्झौता थियो तर निर्धारित समयमा काम हुन नसकेपछि आगामी पुस १५ गतेसम्मका लागि पुनः म्याद थप गरिएको छ ।
प्रदेश सरकारको २६ करोड २९ लाख ६ हजार २२५ रुपैयाँमा लगानीमा ७ दशमलव १२१ किलोमिटर कालोपत्रे हुन लागेको हो । बेंसीशहर नगरपालिका–१ उदिपुरदेखि दोर्दी गाउँपालिका–४ मा रहेको दोर्दी गाउँपालिका जोड्ने सडकको अस्फाल्ट कालोपत्रे हुने पूर्वाधार विकास कार्यालयले जनाएको छ ।
कार्यालयका रोड इन्जिनीयर राजेश अधिकारीका अनुसार हालसम्म ५० प्रतिशत मात्र भौतिक प्रगति भएको छ भने वित्तीय प्रगति ३६ दशमलव ५१ प्रतिशत छ । हालसम्म ९ करोड ६० लाख २० हजार १० रुपैयाँ कार्यालयले ठेकेदार कम्पनीलाई दिइसकेको उनको भनाइ थियो ।
हालसम्म नाली र एउटा आरसीसी कल्र्भटका साथै सडकको बेस बसाउने काम सम्पन्न भएको छ भने यतिबेला ग्याबेल, ग्याबिन वाल, मशिन वाल, स्ट्रक्चरको काम भइरहेको उनको भनाइ थियो । सडकमध्ये २ ठाउँमा १ हजार ११३ घनमिटर सडक ढलान गर्ने भएको छ ।
सडक कोभिडका कारण र निर्माण कार्य शुरू गर्न ढिलाइ भएको जनाउँदै निर्माण कम्पनीले निर्धारित समयमा निर्माण कार्य सम्पन्न नगरे पनि पुनः म्याद थप गरिएको समयमा भने सम्पन्न गर्नसक्ने पूर्वाधार विकास कार्यालयले जनाएको छ ।
कार्यालयका अनुसार सडकको विभिन्न स्थानमा ६० कामदार संलग्न छन् । सडक निर्माण भएसँगै दोर्दी पालिका र सडक आसपासका वासिन्दालाई सदरमुकाम बेंसीशहरसम्म आउनका लागि समय समयको बचत हुनाका साथै सहज यात्रा गर्न पाउने छन् भने किसानले उब्जाएका खेतीपाती समेत सदरमुकामसम्म ल्याउन सहज हुने भएको छ ।
गाउँपालिकाका अध्यक्ष युवराज अधिकारीले सडक चाँडै सम्पन्न गराउन सम्बन्धित निकायमा कुरा उठाउँदै आएको बताए । सडक कालोपत्रे नहुँदा वर्षायाममा हिलाम्मे र हिउँदमा धुलाम्मे सडककोे यात्रामा कठिनाइ हुँदा जनताले सास्ती भोग्दै आउनुपरेकाले आफूले सक्दो पहल गर्दै आएको उनको भनाइ थियो ।
