सत्तारूढ गठबन्धन आज (मंगलवार) पनि आगामी निर्वाचनमा सिट बाँडफाँटबारे टुंगो लगाउन असफल भएको छ । मंगलवार अपराह्नदेखि गठबन्धन दलका शीर्ष नेताहरू सिट बाँडफाँटबारे सहमति जुटाउन छलफलमा बसे पनि सहमति हुन नसकेको हो ।

प्रधानमन्त्री निवास बालुवाटारमा भएको बैठकमा शीर्ष नेता, तथा  सिट बाँडफाँट कार्यदलका सदस्यबीच छलफल भएको थियो । तर, मंगलवारको बैठकमा पनि दलहरूबीचको दोहोरो दाबीबारे सहमति हुन नसकेको एक नेताले बताए । आजको बैठकमा सहमति नजुटेपछि बुधवार पुनः छलफल गर्ने गरी आजको बैठक टुंगिएको ति नेताले बताए । 

गठबन्धनका नेताहरू भोलि (बुधवार) दशैंको टीका ग्रहण गरेर छलफल हुनेछ । नेताहरूबीच बुधवार दिउँसो ३ बजे पुन प्रधानमन्त्री निवासमै छलफल हुने तय भएको छ । 

प्रतिनिधि सभा र प्रदेश सभाको निर्वाचनअन्तर्गत प्रत्यक्षतर्फ उम्मेदवारी मनोनयन गर्ने दिन नजिकिँदै गएको छ । निर्वाच आयोगले असोज २३ गते प्रत्यक्षतर्फको उम्मेदवारी मनोनयन गर्ने दिन तोकेको छ ।