सन् २०२६ को फिफा विश्वकप शुरू हुनुअघि फ्रान्स र स्पेन दुवैलाई उपाधिको सबैभन्दा बलियो दावेदार मानिएको थियो । अहिले यो अनुमान सत्य सावित भएको छ । यी दुई फुटबलका महाशक्ति राष्ट्रहरू आगामी मंगलबार डल्लास स्टेडियममा हुने पहिलो सेमिफाइनलमा आमने-सामने हुँदै छन्, जसलाई सबैभन्दा ठुलो निर्णायक भिडन्तका रूपमा हेरिएको छ।

लस एन्जलस स्टेडियममा भएको रोमाञ्चक क्वार्टरफाइनलमा बेल्जियमलाई २–१ ले पाखा लगाउँदै स्पेनले सन् २०१० पछि पहिलो पटक विश्वकपको सेमिफाइनलमा स्थान सुरक्षित गर्‍यो । अर्कोतर्फ, बोस्टन स्टेडियममा भएको खेलमा मोरक्कोलाई २–० ले हराउँदै फ्रान्सले अन्तिम चारको टिकट काटेको हो । अब क्लब फुटबलका चिरपरिचित प्रतिद्वन्द्वी किलियान एम्बाप्पे र लामिन यामल अन्तर्राष्ट्रिय मञ्चमा पुनः आमनेसामने हुने भएका हुन् । 

विश्वकपमा फ्रान्सको प्रदर्शन पूर्ण रूपमा आक्रामक र बलियो रहँदै आएको छ । अहिलेसम्म खेलेका ६ वटै खेलमा शतप्रतिशत जितको नतिजा निकाल्दै फ्रान्स सेमिफाइनल पुगेको हो। मंगलबार स्पेनलाई हराएमा फ्रान्स सन् २००२ को ब्राजिलपछि विश्वकपमा लगातार ७ वटा स्पष्ट जित निकाल्ने दोस्रो टोली बन्नेछ ।

फ्रान्सेली टोलीको यो ऐतिहासिक यात्राको केन्द्रमा कप्तान किलियान एम्बाप्पे छन्। उनले ६ खेलमा प्रतियोगिताकै सर्वाधिक ८ गोल गरिसकेका छन्। लगातार दुईवटा विश्वकपमा ८ वा सोभन्दा बढी गोल गर्ने उनी विश्वकै पहिलो खेलाडी बनेका छन् भने विश्वकपमा मात्रै २० खेल खेल्दै २० गोल पूरा गर्ने ऐतिहासिक कीर्तिमान पनि उनको नाममा दर्ता भइसकेको छ। 

विश्वकपको इतिहासमा एम्बाप्पे र लियोनेल मेस्सी (२१ गोल) मात्रै यस्ता खेलाडी हुन्, जसले २० वा सोभन्दा बढी गोल गरेका छन्। स्पेनविरुद्ध एक गोल थपेमा उनले मेस्सीको २१ गोलको सर्वकालीन रेकर्ड बराबरी गर्नेछन् ।

२७ वर्षको उमेरअघि दुईवटा विश्वकप जित्ने कीर्तिमान फुटबलका जादुगर पेलेको नाममा मात्र छ। यदि एम्बाप्पेले स्पेनको चुनौती समाप्त पारे भने उनी पेलेको त्यो दुर्लभ कीर्तिमान बराबरी गर्न मात्र एक कदम टाढा हुनेछन् । फ्रान्सका लागि माइकल ओलिसे अर्का नायक साबित भएका छन्, जसले ६ खेलमा सर्वाधिक ६ असिस्ट गरिसकेका छन्।

फ्रान्सको जस्तो एकतर्फी नतिजा नभए पनि स्पेनले हरेक कठिन परिस्थितिबाट बाटो निकाल्दै आफूलाई प्रमाणित गरेको छ। समूह चरणमा साउदी अरबविरुद्ध ४–० र अन्तिम ३२ मा अस्ट्रियाविरुद्ध ३–० को जितबाहेक स्पेनका अन्य सबै जितहरू १ गोलको अन्तरले मात्र सम्भव भएका हुन्। पोर्चुगलविरुद्ध त स्पेनले इन्जुरी समयमा निर्णायक गोल गरेको थियो।

स्पेन यो स्थानसम्म आइपुग्नुको मुख्य जग उसको बलियो डिफेन्स हो। बेल्जियमविरुद्ध गोल खानुअघि स्पेनले लगातार ६ खेलमा कुनै गोल खाएको थिएन, जुन विश्वकप इतिहासकै सबैभन्दा लामो ‘क्लिन सिट’को रेकर्ड हो। स्पेनका गोलकिपर उनाई सिमोनले लगातार ६४९ मिनेटसम्म गोल नखाई जर्मनीकी नाडिन एङ्गेररको ६२२ मिनेटको पुरानो कीर्तिमान भङ्ग गरेका छन्।

युवा स्टार लामिन यामलका लागि यो विश्वकप शुरूआती चरणमा केही खल्लो रह्यो। चोटबाट फर्किएका यामलले साउदी अरबविरुद्ध एक गोल गरेयता अन्य खेलमा सोचेजस्तो जादु देखाउन सकेका थिएनन्। तर, पछिल्ला खेलहरूमा उनको लय फर्किएको संकेत देखिएको छ, जसले स्पेनिस क्याम्पमा उत्साह थपेको छ।

मंगलबार हुने यो महाभिडन्तअघि स्पेनका सनसनीपूर्ण युवा खेलाडी यामलले मनोवैज्ञानिक युद्ध शुरू गरिसकेका छन्। बेल्जियमविरुद्ध ‘म्यान अफ द म्याच’ चुनिएपछि मिडियासँग कुरा गर्दै उनले फ्रान्सलाई सिधा चेतावनी दिए। 'मेरो विचारमा, यदि फ्रान्सले यो विश्वकपमा कसैसँग डराउनुपर्छ भने त्यो हामीसँग हो। किनभने यसअघि पनि उनीहरूलाई महत्त्वपूर्ण प्रतियोगिताहरूबाट बाहिर निकाल्ने टोली हामी नै हौँ,' उनले भने ।