१० साउन २०८३, आइतबार
पूर्वप्रधानमन्त्री केपी शर्मा ओलीले शिलान्यास गरेको नागढुंगा सुरुङमार्गको शिलालेख हटाइएको विषय सामाजिक सञ्जालमा चर्चामा छ । सन् २०१९ मा ओलीले नागढुंगा सुरुङमार्गको शिलान्यास गरेका थिए ।
काठमाडौं र धादिङलाई जोड्ने गरी निर्मित नागढुंगा–सिस्ने खोला सुरुङमार्गको सोमबार उद्घाटन हुँदैछ । करिब २९ अर्ब रूपैयाँ लगानीमा बनाइएको यो सुरुङ शिलान्यासको ७ वर्षपछि उद्घाटन गर्न लागिएको हो ।
तर, उद्घाटनको सँघारमा ओलीले शिलान्यास गरेको शिलालेख हटाइएको भन्दै सामाजिक सञ्जालमा चर्चा बढेको हो ।
आयोजनाका अनुसार शिलान्यासपछि शिलापत्र राखिएको ठाउँमा नयाँ संरचना निर्माण गर्नुपर्ने भएकाले उक्त शिलापत्र सडक विभागको वैदेशिक महाशाखामा राखिएको थियो ।
गत भदौ २३ र २४ गते भएको आन्दोलनमा विभागको भवनमा पनि आगजनी भएको थियो । भवनसँगै उक्त शिलापत्र पनि जलेको दाबी आयोजनाको छ ।
अहिलेसम्म शिलान्यास गरिएको शिलापत्र नभेटिएकोले नयाँ राख्ने अथवा नराख्ने विषयमा कुनै जानकारी नभएको नागढुंगा सुरुङमार्ग निर्माण आयोजनाका सूचना अधिकारी सञ्जय पन्थीले जानकारी दिए ।
विभागको भवनभित्रै राखिएको शिलापत्र भवन ध्वस्त भएपछि नभेटिएको र अहिले ठ्याक्कै पछि बनाएर राख्ने/नराख्ने जानकारी नभएको उनको भनाइ छ ।
