यस वर्षको विजया दशमी कलाकारहरूले धुमधामसँग मनाएका छन् । अभिभावकबाट बडादशैंको टीका ग्रहण गरेका तस्वीरहरू कलाकारहरूले सामाजिक सञ्जालमार्फत् सार्वजनिक गरेका छन् । 

नेपालको पहिलो अभिनेत्री भुवन चन्दले श्रीमान् माइकल चन्दको हातबाट टिका ग्रहण गरेपछि परिवारका अन्य सदस्यलाई पनि टिका लगाइदिएकी छन् । यस्तै अभिनेता हरिवंश आचार्यले दिवंगत श्रीमती मिरा आचार्यको तस्वीर राखेर पत्नी, छोरा र बुहारीलाई टिका लगाइदिएका छन् । 

यसैगरी अभिनेता अनमोल केसीले पिता तथा अभिनेता भुवन केसीको हातबाट टिका र जमरा थापेर आशिर्वाद लिएका छन् । ‘छड्के २’ को छायांकनमा व्यस्त अनमोल लगत्तै ‘जेरी’मा व्यस्त रहनेछन् । 

अभिनेत्री सुहाना थापाले बुबा सुनिलकुमार थापा र आमा झरना थापाबाट टिका ग्रहण गरेकी छन् । अभिनेत्री तथा निर्देशक दीपाश्री निरौलाले बुवाबाट, अभिनेता तथा निर्देशक निर्मल शर्माले आमाबाट र अभिनेता जितु नेपालले आमाको हातबाट टिका ग्रहण गरेका छन् । 

यस्तै आमाबाट टिका र जमरा ग्रहण गरेपछि सामुहिक तस्वीर खिचाउँदै हाँस्यकलाकार शिवशंकर रिजालले दशैंको शुभकामना दिएका छन् । ‘तराई गएर अन्य मान्यजनबाट टिका ग्रहण गर्नेछु । मेरो दशैं तराई र काठमाडौंमा बराबर हुँदै आएको छ’, उनले सामाजिक सञ्चालमा लेखेका छन् । रासस