२७ असार २०८३, शनिबार
कात्तिक ११ गतेका लागि प्रदर्शन मिति तोकिएको चलचित्र ‘लाखे’ एक साता पछि सरेको छ ।
चलचित्र अब कार्तिक १८ गतेदेखि प्रदर्शनमा आउने भएको हो ।
केही समय यता एक हप्ताको अन्तरालमा चलचित्र प्रदर्शन भइरहेका छन् ।
कार्तिक ११ मा ‘महापुरुष’ पनि भएपछि प्रदर्शन मिति फेरबदल गरिएको हो ।
भदौ ३१ गतेलाई रिलिज तय गरिएको ‘लाखे’ प्राविधिक काम नसकिएपछि कार्तिक ११ मा प्रदर्शन हुने तयारीमा थियो ।
‘मह जोडी अभिनित चलचित्रलाई सम्मान गर्दै नयाँ प्रदर्शन मिति तय गरेका हौँ । दर्शकले नेपाली चलचित्रलाई माया गरिरहेको समयमा सम्भावना बोकेका चलचित्रहरू भिड्नु राम्रो होइन,’ चलचित्रका निर्माता डिपी भण्डारीले भने ।
‘लाखे’ चलचित्र युनिटले देखाएको हार्दिकता प्रति ‘महापुरुष’ का कार्यकारी निर्माता रबिन्द्र सिंह बानियाँले कृतज्ञता व्यक्त गरे ।
‘उहाँहरूको निर्णय प्रति आभार व्यक्त गर्दछु । यो समय एकआपसमा मिलेर नै अगाडि बढ्ने हो,’ उनले भने ।
सम्राट बस्नेत निर्देशित चलचित्र ‘लाखे’मा सौगात मल्ल, अनुप बिक्रम शाही, अर्पण थापा, आर्यन अधिकारी, वर्षा राउत, रोहित रुम्वा, संजोग राणा, सुशील सिटौला, प्रशान्त ताम्राकार, रक्षा बुढाथोकी, कालु राना, सुगन तण्डुकार र बाल कलाकार सिस्टम भण्डारी लगायतको अभिनय रहेको छ ।
सिजन अर्यालको कथा र निर्माण रहेको चलचित्रको निर्मातामा डिपी भण्डारी र गणेश मल्ल ठकुरी (जिएम) छन् ।
हरि मल्ल ठकुरी कार्यकारी निर्माता रहेको चलचित्र सुजन प्रजापतिले खिचेका हुन् भने कोरियोग्राफी कविराज गहतराजको छ ।
निर्देशक सम्राटकै द्धन्द्ध निर्देशन रहेको चलचित्रका गीतमा दीपक बज्राचार्य र हर्कुलस बस्नेतको संगीत छ ।
‘लाखे’ अर्जुन जिसीले सम्पादन गरेका हुन् ।
औरियन प्रोडक्सनले ग्लोवल मिडिया एण्ड रिसर्च सेन्टरसँगको सहकार्यमा निर्माण गरेको चलचित्रकोे पटकथा आकाश बरालले लेखेका हुन् भने सम्वादमा उनलाई अनुप न्यौपाने सघाएका छन् ।
चलचित्रलाई रोहित कट्टेल र रत्न श्रेष्ठले आरआर फिल्मस् मार्फत वितरण गर्दैछन् ।
चलचित्र सस्पेन्स थ्रीलर जनरामा निर्माण भएको हो ।
