१८ असार २०८३, बिहीबार
पाकिस्तानको निर्वाचन आयोगले पाकिस्तान तहरीक–ए–इन्साफका प्रमुख इमरान खानलाई पाँच वर्षसम्म चुनाव लड्न प्रतिबन्ध लगाएको छ ।
तोषाखानाका विषयमा गलत दाखिला गरेको भन्दै धारा ६३(१)(पी) अन्तर्गत खानलाई निर्वाचन लड्न अयोग्य घोषित गरिएको हो ।
आयोगका प्रमुख आयुक्त सिकन्दर सुल्तान राजाको अध्यक्षतामा बसेको पाँच सदस्यीय इजलासले इस्लामाबादमा शुक्रवार यो घोषणा गरेको हो ।
यो सर्वसम्मत निर्णय हो । तर पञ्जाबका सदस्य आजको घोषणामा उपस्थित थिएनन् ।
फैसलाअनुसार, इमरानले गलत दाखिला गरेकोमा फौजदारी प्रक्रिया अघि बढाइनेछ ।
इमरानले तोषाखाना अर्थात् सरकारले पाउने उपहारको विवरण तथा तिनको बिक्रीबाट उठेको रकमका बारेमा नबताएको भन्दै बहालवाला सरकारले उनीविरुद्ध उजुरी दर्ता गरेको थियो ।
इमरान खानको लोकप्रियताबाट आत्तिएको सरकारले उनलाई चुनावी प्रतिस्पर्धाबाट बाहिर राख्न निर्वाचन आयोगको दुरुपयोग गरेको आरोप पीटीआई दलले लगाएको छ ।
