१२ असार २०८३, शुक्रबार
चुनाव नजिकिएसँगै व्यवसायिक गीत रिलिजमा कमी आएको छ ।
युट्युबमा चुनावलक्षित गीतहरू धमाधम सार्वजनिक भइरहेका छन् ।
व्यवसायिक गीतहरूको संख्यामा भने आधाले भन्दा कमी आइसकेको छ ।
आउँदा दिनमा व्यवसायिक गीतहरूको संख्यामा अझ कमी आउने निर्देशकहरू बताउँछन् ।
धेरै लगानीकर्ता एवं निर्देशकहरू तयार भिडियो पनि चुनावपछि मात्रै सार्वजनिक गर्ने तयारीमा छन् ।
यतिबेला दर्शकहरूको ध्यान चुनावमा हुने भएकाले व्यवसायिक गीतहरूमा कमी आएको हो ।
कलाकार शिशिर भण्डारीले आफ्नो नयाँ गीतले अपेक्षित भ्युज नपाउनुमा चुनावी माहोल कारण हुनसक्ने अनुमान गरेका छन् ।
‘हैन चुनाव लागेर हो त हाम्रो नयाँ गीतको भ्युज नगएको ? कि गीतै राम्रो भएन ?’ शिशिरले फेसबुकमा दर्शकलाई प्रश्न सोधेका छन् ।
मोडल विमल अधिकारी अब आफूले चुनावपछि मात्रै नयाँ गीत सार्वजनिक गर्ने बताउँछन् ।
‘एक दुई दिनमा दुईवटा गीत सुटिङका लागि निस्किँदैछु । तर, सार्वजनिक भने चुनाव भएर नतिजा सार्वजनिक भएपछि मात्रै गर्ने हो’ उनले भने ।
निर्देशक मदन खड्का चुनावसम्म व्यवसायिक गीतहरू कमै आउने बताउँछन् ।
चुनावको एक साता पछिसम्म व्यवसायिक गीतहरूको बजार सुस्ताउने उनको बुझाई छ ।
