ललितपुर–३ की उम्मेदवार डा. तोमिमा कार्कीको उम्मेदवारी खारेज नगर्न सर्वोच्चको अन्तरिम आदेशमा निर्वाचन आयोगले दर्ता गराएको भ्याकेट निवेदनको सुनुवाइ सकिएको छ ।

न्यायाधीशहरू इश्वरप्रसाद खतिवडा र तिलप्रसाद श्रेष्ठको संयुक्त इजलासमा सोमबार भ्याकेट निवेदनबारे सुनुवाइ भएको हो । 

डा. कार्की लाभको पदमा रहेको कारण उनको उम्मेदवारी खारेज हुने निर्णय निर्वाचन आयोगले गरेको थियो । मेडिकल काउन्सिल सदस्य रहेकी कार्कीले लाभको पदमा रहेको निश्कर्ष निर्वाचन आयोगको थियो । 

त्यसविरूद्ध कार्कीले सर्वोच्चमा रिट दर्ता गरेकी थिइन् । सोही रिटको सुनुवाई गर्दै सर्वोच्चले आयोगको निर्णय कार्यान्वयन नगर्न अन्तरिम आदेश दिएको थियो । 

डा. कार्की ललितपुर–३ बाट राष्ट्रिय स्वतन्त्र पार्टीको तर्फबाट प्रतिनिधिसभा सदस्य पदको उम्मेदवार छिन् ।