१० साउन २०८३, आइतबार
नेपालमा छायाङ्कन गरिएको बलिउड चलचित्र ‘उचाइ’ यतिबेला हलमा प्रदर्शन भइरहेको छ ।
नेपालमा ७० प्रतिशतभन्दा बढी दृश्य छायांकन गरिएको चलचित्र हेरेपछि अभिनेता दीपकराज गिरीले खुलेर प्रशंसा गरेका छन् ।
उनले ‘उचाइ’ हेरिरहँदा नेपाल र सगरमाथाका बारेमा बोलिएको मनछुने संवादहरुले आँखा रसाउने बताएका छन् ।
‘भारतबाट नेपालको बिषयमा बनाएको सम्भवत सबैभन्दा राम्रो चलचित्र । समय मिल्छ भने हामीले पनि हेरेर साथ दिऔं’, उनले फेसबुकमा लेखेका छन ।
सुरज आर बडजात्या निर्देशित २ घण्टा ५३ मिनेट लामो चलचित्रमा अमिताभ बच्चन, अनुपम खेर, बोमन इरानी, ड्यानी डेन्जोङ्पा, परिणिती चोपडा लगायतका कलाकारको अभिनय छ ।
४ साथीको मित्रता र नेपाल भ्रमणको कथामा यो चलचित्रलाई निर्माण गरिएको छ ।
सगरमाथालाई शक्ति र उर्जाकोरूपमा चलचित्रमा प्रस्तुत गरिएको छ । चलचित्रमा नेपालका प्राविधिक, केही कलाकार र नेपालकै उपकरणहरुको प्रयोग गरिएको छ । नेपालमा समेत यतिबेला चलचित्रले राम्रो व्यापार गरिरहेको छ ।
