०२ असार २०८३, मंगलबार
हिमाली जिल्ला मनाङको नार्पाभूमि क्षेत्रमा ग्यास नबल्दा जनजीवन कष्टकर बनेको छ ।
मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि ग्यास बोकेर मतदान केन्द्रमा मतदान अधिकृतसहित कर्मचारी र सुरक्षाकर्मी पुगेका छन् तर चिसोका कारण खच्चडमार्फत लगिएको ग्यास नबल्दा जनजीवन कष्टकर बनेको छ ।
‘खच्चडमार्फत ग्यास सिलिन्डर बोकेर ल्याइयो । बलेन, चिसोले होला,’ सदरमुकाम चामेबाट २ दिन पैदल हिँडेर पुगेका नार्पाभूमि गाउँपालिका–३ वडा कार्यालयका मतदान अधिकृत राजेन्द्रकुमार श्रेष्ठले भने, ‘आगो बाल्न दाउरा किन्दा भारीको २ हजार पर्यो, समस्या टार्नै पर्यो ।’
केन्द्रमा ६ जना कर्मचारी र सेना, प्रहरी, सशस्त्र प्रहरी र म्यादी प्रहरी गरी २० जना खटिएका छन् । केही नजिकै अन्य २ मतदान केन्द्र रहेको छ । त्यस क्षेत्रका सबैको अवस्था सकसपूर्ण छ । नार्पाभूमि–१ देखि ३ सम्म नारगाउँमा पुगेका कर्मचारी वडा कार्यालय, विद्यालय, गुम्बा लगायत ठाउँमा बास बसेका छन् ।
चिसो बढेको र पानी समेत जमेको हुँदा तताएर खान समस्या भएको मतदान केन्द्रमा खटिएका कर्मचारी बताउँछन् ।
सडक सञ्जालले नजोडिएको नार्पाभूमि–४ फू गाउँ (४ हजार ५० मिटर) स्थित फू आधारभूत विद्यालय केन्द्रका मतदान अधिकृत जिल्ला न्यायाधिवक्ता नवराज रेग्मीले मतदानस्थल निकै उचाइमा रहेकाले चिसो पनि उच्च रहेको बताए । ‘यहाँ निकै चिसो छ । आगो तापेर बस्नुपरेको छ । बाहिर निस्कन सकिरहेको छैन । यहाँको तापक्रम माइनसमा छ र कष्टकर बनेको छ,’ रेग्मीले भने ।
मुख्य निर्वाचन अधिकृत उत्तम सिलवालले मौसमको प्रतिकूलताले नार र फू गाउँ पुगेका कर्मचारीको अवस्था निकै कष्टकर भएको बताए । बुधवार सबेरै गएका कर्मचारी र सुरक्षाकर्मी बिहीवार अबेर मतदान केन्द्रमा पुगेका थिए । सबै क्षेत्रमा एकैसाथ निर्वाचन भएकाले पनि सकसपूर्ण अवस्थामा नै कर्मचारी खटिएको उनले बताए ।
‘यसपटकको निर्वाचनका लागि सबै सामग्री कर्मचारी, सुरक्षाकर्मीसँगै पठाइयो । २ दिन लगाएर उहाँहरू पुग्नुभएको छ । ग्यास, चामल, दाल, नुनतेल सबै बोकेर जानुपर्दा समस्या भयो,’ उनले भने । नार गाउँमा चिसोले ग्यास नबलेको र ४ वटा दाउराकै १ हजार ५०० तिर्नुपरेको उनले बताए ।
निर्वाचन आयोगले मतदान अधिकृतलाई दैनिक २ हजार ५०० दिन्छ । कार्यालय सहयोगीले १ हजार २०० पाउँछन् । सुरक्षाकर्मीले खाजा भत्ता दिनको ६०० पाउँछन् । ‘एक गिलास तातोपानीको १०० पर्छ । सुगममा ६०० ले २ छाक खान पुग्छ । विकटमा खटिनेलाई साह्रै समस्या छ,’ उनले भने ।
मनाङमा २०० कर्मचारी खटिएका छन् । सिंगो नार्पाभूमि गाउँपालिकामा ४६८ मतदाता रहेका छन् । वडा नम्बर १ को कार्यालय नारगाउँमा ९६, वडा नम्बर २ को नार आधारभूत विद्यालयमा १०३ र साम्डुछिरिङ गुम्बा मतदान केन्द्रमा १२० मतदाता छन् ।
फू गाउँअन्तर्गत वडा नम्बर ४ को फू आधारभूत विद्यालयमा ७८ र वडा नम्बर ५ को कार्यालयमा ७१ मतदाता छन् । मनाङ जिल्लामा पुरुष ३ हजार २८१ र महिला ३ हजार ४९८ गरी कूल ६ हजार ७७९ मतदाता रहेको जिल्ला निर्वाचन अधिकारी पुष्पराज शर्माले जानकारी दिए । मनाङमा साँझ, बिहान र रातिको तापक्रम माइनसमा झरेको छ ।
सबैभन्दा उचाइमा रहेको नार (४ हजार २०० मिटर ) मा धाराको पानी समेत जमेको मतदान अधिकृत बताउँछन् । – नवीन लामिछाने/रासस
