चापाकल चुनाव चिह्न लिएर निर्वाचनको मैदानमा खडा भएका ४ स्वतन्त्र उम्मेदवारले चुनाव जितेका छन् । निर्वाचन आयोगले स्वतन्त्र उम्मेदवारलाई विभिन्न चिह्न प्रदान गर्ने गर्छ, जसमा चापाकल चिह्न पाएका चार उम्मेदवारले स्वतन्त्र हैसियतमै चुनाव जितेका हुन् । 

मोरङ ५ बाट योगेन्द्र मण्डल, रौतहट ३ बाट प्रभु साह, २ बाट किरण कुमार साह र बर्दिया २ बाट लालवीर चौधरीले चापाकल चिह्नमा ती क्षेत्रका उम्मेदवारले भन्दा धेरै मत पाएर चुनाव जितेका हुन् । 
यस्तै माछा चिह्न पाएका सर्लाही ४ का उम्मेदवार अमरेश कुमार सिंहले पनि स्वतन्त्र हैसियतमै चुनाव जितेका छन् । कांग्रेसले टिकट नदिएपछि अमरेशले स्वतन्त्र उम्मेदवारी दिएर चुनाव जितेका हुन् ।

मोरङ ५ मा योगेन्द्र मण्डलले माओवादी केन्द्रका शिवकुमार मण्डललाई पराजित गरे । सत्ता गठबन्धनका मण्डलले १७ हजार ४८६ मत पाउँदा विजयी भएका मण्डलले २१ हजार ८२१ मत पाए । 
यसैगरी रौतहट २ मा किरण कुमार साहले ३२ हजार ८४२ मत पाएर विजय हासिल गर्दा हाल जेलमा रहेका आफताव आलका छोरा तथा कांग्रेस उम्मेदवार फिरदोस आलम २८ हजार २४८ मत ल्याएर पराजित भए । 

यसैगरी रौतहट ३ मा पनि प्रभु साह स्वतन्त्र हैसियतमै विजयी भए । उनले ३२ हजार ४३७ मत पाएर विजय हासिल गरेका हुन् । उनले आफूले महागठबन्धनलाई स्वतन्त्र हैसियतमै हराएको दाबी गरेका छन् । यद्यपि माओवादीसहितको गठबन्धनले केन्द्रबाट उनलाई समर्थन गर्ने निर्णय गरेको थियो । तर, माओवादीका उम्मेदवार स्थानीयस्तरमा समर्थन गर्न तयार नभएपछि उम्मेदवारी कायम रह्यो । उसो त एमालेले टिकट दिँदादिँदै साहले अन्तिममा स्वतन्त्र उम्मेदवारी दिएका थिए । 

यस्तै बर्दिया २ मा चापाकल चुनाव चिह्न बाहक लालवीर चौधरीले विजय हासिल गरे । स्वतन्त्र उम्मेदवारी दिएका उनी हाल जेलमा रहेका नागरिक उन्मुक्ती पार्टीका रेशम चौधरीका बाबु हुन् ।  आफ्नो उम्मेदवारी खारेज हुने खतरा भएकै कारण रेशमले बुबालाई स्वतन्त्र उम्मेदवारी दिन लगाएका थिए । लालवीरलाई नागरिक उन्मुक्ति पार्टीको पूर्ण सहयोग थियो । लालवीरले २६ हजार ५२० मत ल्याएर विजय हासिल गर्दा माओवादीका उम्मेदवार सुरेश पन्थ २६ हजार ३८४ मत पाएर पराजित बने । 

हालसम्म स्वतन्त्रबाट चुनाव जितेका अमरेश कुमार सिंहको भने चुनाव चिह्न माछा थियो । उनले कांग्रेसका उम्मेदवारलाई हराउँदै आफ्नो जित सुनिश्चित गरेका हुन् ।