०४ साउन २०८३, सोमबार
लामो समयसम्म भेनेजुएलामाथि विभिन्न किसिमका प्रतिबन्धहरू लगाइरहेको अमेरिका अहिले आएर झुकेको छ ।
अमेरिकाको ट्रेजरी डिपार्टमेन्टले शेभरोन नामक बहुराष्ट्रिय ऊर्जा कम्पनीलाई भेनेजुएलाको तेल अमेरिका भित्र्याउन अनुमति दिएको छ । भेनेजुएलाका विपक्षी तथा सरकारबीचको वार्तामा सकारात्मक मोड आएपछि प्रतिबन्ध फुकाएको डिपार्टमेन्टको भनाइ छ ।
भेनेजुएला सरकारलाई चाहिँ अमेरिकाले अहिलेसम्म पनि मान्यता दिएको छैन ।
डिपार्टमेन्टले शनिवार जारी गरेको विज्ञप्ति अनुसार, शेभरोन कर्पोरेसनले भेनेजुएलामा सीमित मात्रामा प्राकृतिक स्रोत उत्खनन गर्न अनुमति पाएको छ । तर यसबापत शेभरोनलाई हुने नाफा भेनेजुएला सरकारले दिन नपाउने शर्त उसले राखेको छ ।
भेनेजुएलाबाट निकालिएको तेल अमेरिकामा मात्र निर्यात गर्न पाइने तथा यसबाट हुने नाफा शेभरोन एक्लैले पाउने शर्त पनि छ । अहिले शेभरोनले भेनेजुएलाको राज्यनियन्त्रित तेल कम्पनी पेट्रोलियोस दे भेनेजुएला एसएसँग मिलेर काम गरिरहेको छ ।
शेभरोनले भेनेजुएलाबाट कति तेल निकालेर अमेरिका निर्यात गर्न पाउँछ भनी खुलेको छैन । यसले विश्वव्यापी तेलको मूल्यमा कति असर पर्छ भन्ने पनि थाहा हुन सकेको छैन ।
भेनेजुएलालाई अमेरिकाले विगत १५ वर्षदेखि प्रतिबन्ध लगाइरहेको छ । देशका राष्ट्रपति निकोलस मदुरोलाई समेत उसले मान्यता दिएको छैन । मदुरोको साटो संसद्का सभामुख खुवान गुआइडोलाई देशका अन्तरिम शासकका रूपमा अमेरिकाले मान्यता दिएको छ ।
रुस–युक्रेन द्वन्द्वका कारण रुसी तेलको विकल्प खोज्ने क्रममा अमेरिका भेनेजुएलासँग झुक्न बाध्य भएको हो ।
