जनमत पार्टीका अध्यक्ष सीके राउतले  राजनीतिक भेटवार्तालाई जारी राखेका छन् । निर्वाचनमा विजयी भएलगत्तै काठमाडौं आएका सीकेले राजनीतिक भेटवार्तालाई जारी राखेका हुन् । 
सोही क्रममा बुधबार जसपाका अध्यक्ष उपेन्द्र यादव, लोसपाका अध्यक्ष महन्थ ठाकुरसँग छुट्टाछुट्टै भेटवार्ताका गरेका छन् । यस्तै सीकेले एमाले अध्यक्ष केपी शर्मा ओलीसँग पनि भेट गरेको महासचिव चन्द सिंहले जानकारी दिए । 
उनका अनुसार सबै भेट छुट्टाछुट्टै भएको हो । भेटमा राजनीतिक कुराकानीका साथै बधाई साटासाट पनि भएको उनको भनाइ छ । मंसिर ४ को निर्वाचनमा सीके राउतले सप्तरी २ मा जसपाका अध्यक्ष  यादवलाई हराएका थिए । उनै यादवलाई सीकेले बुधबार भेट गरेका हुन् । सो क्रममा सीकेलाई यादवले एक पुस्तक समेत हस्तान्तरण गरेको बताइएको छ।  

यस्तै आफूलाई मुल धारको राजनीतिमा ल्याउने ओलीसँग पनि सीकेले भेटवार्ता गरेका हुन् । ओलीले प्रधानमन्त्री भएको बेला स्वतन्त्र मधेसको अभियान चलाइरहेका सीकेलाई मूलधारको राजनीतिमा ल्याउने काम गरेका थिए । 
सीके राउतले काठमाडौंमा राष्ट्रपति विद्यादेवी भण्डारीदेखि प्रधानमन्त्री शेरबहादुर देउवा, माओवादी केन्द्रका अध्यक्ष प्रचण्डसहित दर्जन बढी नेताहरुसँग भेटवार्ता गरिसकेका छन् । राउतले हाल कायम सत्ता गठबन्धनसँग सहकार्य गरेर सरकारमा जाने आकांक्षा देखाएका छन् ।