०५ साउन २०८३, मंगलबार
प्रमुख दलहरूले प्रत्यक्षमा महिलालाई टिकट नदिँदा कर्णाली प्रदेश सभामा समानुपातिकका कूल १६ सिटमा १५ जना महिला उम्मेदवारलाई सिफारिस गर्नुपरेको छ । समानुपातिक मत परिणामअनुसार कर्णाली प्रदेश सभाका लागि नेकपा (एमाले) र नेपाली कांग्रेसले पाँच–पाँच सिट, नेकपा (माओवादी केन्द्र)ले चार, नेकपा (एकीकृत समाजवादी) र राप्रपाले एक–एक वटा पाएका थिए ।
प्रत्यक्षका २४ सिटमा सबै पुरुष उम्मेदवार निर्वाचित भएका छन् । जसले गर्दा दलहरूले आफूले पाएको समानुपातिक सिटमा महिला पठाउनुपरेको हो । ४० सदस्यीय प्रदेश सभामा १५ जना महिला सदस्य हुँदा महिलाको प्रतिनिधित्व करिब ३८ प्रतिशत हुने भएको छ । संविधानमा संसद्मा कम्तीमा ३३ प्रतिशत महिला प्रतिनिधित्व हुनैपर्ने व्यवस्था छ ।
१६ समानुपातिक सिटमध्ये एक जनामात्र पुरुष परेका छन् । एमालेबाट खस–आर्य पिछडिएको क्षेत्रबाट हुम्लाका कलबहादुर हमाल प्रदेश सभा सदस्यमा सिफारिस भएका हुन् । एमालेले शनिवार उनीसँगै चार महिलाको नाम निर्वाचन आयोगमा पठाएको हो ।
अदानचुली गाउँपालिका ५ निवासी ६१ वर्षीय हमाल एमाले हुम्लाका जिल्ला अध्यक्ष हुन् । उनी जनवर्गीय संगठन अखिल नेपाल किसान महासंघको प्रदेश सह–संयोजक समेत हुन् । निर्वाचन आयोगमा बुझाएको समानुपातिक उम्मेदवारको बन्द सूचीमा खस आर्यको तीन नम्बर रहे पनि पिछडिएको क्षेत्रबाट प्राथमिकता क्रममा एक नम्बरमा रहेकाले एमालेले एक जना पुरुषमा उनलाई सिफारिस गरेको हो ।
खस आर्य कलष्टरमा सुर्खेतका बालाराम शर्मा प्राथमिकता क्रम एक नम्बरमा थिए । तर, पिछडिएको क्षेत्रबाट दुई जना पठाउनुपर्ने बाध्यता भएपछि शर्माको साटो तीन नम्बरका हमाललाई पठाइएको हो । हमालसँगै एमालेले पिछडिएको क्षेत्रबाट दलित महिला कलष्टरकी गमता विक (दैलेख) लाई सिफारिस गरेको छ ।
एमालेले दक्षिणा शाही (कालीकोट), तुल्सा मल्ल (रुकुम पश्चिम) र नन्दा गुरुङ (सुर्खेत) लाई सिफारिस गरेको छ ।
कांग्रेसले जानकी सिंह, बलिमाया बुढा (सुर्खेत), लक्ष्मी सुनार (सल्यान), विजया बुढा (हुम्ला) र इन्द्रा शाही (दैलेख) लाई सिफारिस गरेको छ । माओवादी केन्द्रले भने आफूले पाएका चार सिटमा निर्वाचन आयोगलाई सिफारिस गरेको विवरण सार्वजनिक गरेको छैन । नेकपा एकिकृत समाजवादीले कल्याणी खड्का (रुकुम पश्चिम) र राप्रपाले सन्तोषी शाही (सुर्खेत) लाई सिफारिस गरेको छ ।
मंसिर ४ मा सम्पन्न निर्वाचनमा प्रदेश सभामा प्रत्यक्षतर्फका २४ सिटमध्ये कांग्रेस र माओवादी केन्द्रले ९–९ , एमालेले ५ र स्वतन्त्रले १ स्थानमा जितेका छन् ।
